Juullisiutit saqqummersinneqartut nuannarineqarluartut

Kalaallit operamik erinarsortartut, Ida Heinrich aamma Josef Lund Josefsen cd-liaminnik oktobarip 31-ani saqqummersitseqqaarput. Cd juullisiutinik imalik ‘Nuannareqaara’ 3000-nngorlugu saqqummersinneqarpoq, kisianni saqqummersitsinermit sapaatip akunnera ingerlareersoq cd’it tamarmik nungoreerput.

- Tupinnaqaaq tupannarlunilu cd taama sukkatigisumik nungunneqarmat, operamik erinarsortartoq Ida Heinrich Sermitsiaq.AG-mut oqaluttuarpoq.

Cd juullisiutinik imalik ‘Nuannareqaara’ juullisiutinik 15-inik imaqarpoq, erinarsuutilli marluk pattagissamik pattagiarsuarmillu immiullugit marloriarlugit saqqummersinneqarput.

- Pattattutta Søren Johannsenip pingaartikkamiuk taakkua marluk ‘Juullimi qiimasuttut’ aamma ‘Qaammarpoq nuna’ assigiinngitsunik marlunnik saqqummersinneqarnissaat, tassa pattagiarsuarmik pattagissamillu atorneqartillugit, Ida Heinrich oqaluttuarpoq.

Ida Heinrichip aamma Josef Lund Josefsenip cd-liartik Nuuk Centerimi tallimanngormat aamma arfininngormat nittarsaappaat, tassani erinnanik atuipput kingornalu cd-nut atsiortaqattaarlutik. Tassani aamma cd-nik tunisaqarluarput.

- Ulluni taakkunani marlunni cd-nik 500-nik tunisivugut, Ida Heinrich oqaluttuarpoq.

Ida Heinrichip aamma Josef Lund Josefsenip juullerpaluttunik cd-liartik Københavnimi Christian Kirkemi pattattortik Søren Johannsen peqatigalugu juulimi immiuppaat.

Saqqummersitsisullu maanna aamma cd-nik 2000-nik tikisitseqqinniarlutik inniminniisimapput, taakkualu novembarip naanerani nioqqutaalernissaat naatsorsuutigaat.

Taakkua saniatigut operamik erinarsortartut juullerpaluttunik tusarnaartitsisaarlutik novembarimi angalanissartik pilersaarutigaat. Illoqarfiillu Ilulissat, Aasiaat, Qeqertarsuaq, Kangerlussuaq, Tasiilaq immaqalu kujataa kiisalu Københavnimi Kalaallit Peqqissartut Illuat tikissallugit naatsorsuutigaat.