Thursday, December 7, 2017 - 06:03

Juullip Nipitittagaa atornerluisarnerup taarnerani naneruummik ikitsivoq

Ukiormanna juullip nipitittagaanik eqqumiitsuliortup, Gukki Nukap, Juullip Nipitittagaata Aningaasaateqarfiata sammisaq paquminartoq, tassa meeqqanik atornerluisarneq pillugu ukiormanna juullip nipitittagaanik toqqaaneq Kalaallit Nunaannit nersorneqartutut isigaa.

Ukioq manna juullip nipitittagaa immikkuullarissuuvoq. Tassa assigiinngitsut pingasuugamik, nipitittakkat siulliit assigalugit kusanassuseqarput. Kisianni assimi siullernit allaanerussuteqarpoq.

Assilissani meeqqat isaat isigigaanni, itisuumik anniaateqarneq nammataat takuneqarsinnaavoq.

Tassami eqqumiitsuliortuusup Gukki Nukap inuiaqatigiinni apeqqutit oqimaannersaat aamma paquminarnersaat, tassa meeqqanik atornerluinerit sammivai.

- Juullimut nipitittagaliama oqaluttuassartaraa, meeqqat tamarmik ilaquttatik ilagalugit nuannersumik juullisiorneq ajornerat eqqaamassagipput. Amerlasuut nuannaarpallaanngillat, ingammik juullilernerani, eqqumiitsuliortoq Sermitsiaq.AG-mut oqarpoq.

Toqqarneqarnera qularutissartaqanngitsoq
Juullip Nipitittagaata Aningaasaateqarfiani siulersuisut Gukki Nukap siunnersuutaa toqqaramikku oqaluttuassartaa ilisimanngilaat.

- Siulersuisut erniinnartumik assimut paasinnillutillu misiginneqataapput. Assi taartumi qaammartitsivoq, Frida Waaben oqarpoq, taanna danskit tapersiisut komitéannut siulittaasuuvoq.

Allakkap puua ammaramikku Gukki Nukallu assilissanik suna oqariartuutiginiarneranik oqaluttuarinninnera atuaramikku, siulersuisut sammisamit paquminartumit tunuartinngillat, akerlianik pipput.

- Gukkip oqaluttuaa tusaramikku toqqaanerat nukittorsaannarpaa, Frida Waaben oqarpoq.

Taamatullu aaajangerneq Gukki Nukap isaanik taartumi meeqqat qaamanerannik ersarinnerulersitsivoq.

- Sammisamik taama ittumik aatsaat toqqaapput, taamaalillunilu meeqqat nipaatsut nipeqartinneqarput. Tamanna Kalaallit Nunaannit atornerlugaasimanerup kingorna aniguisimasut oqallinnermi inissaqartitsinermik akuersaarnermik uppernarsaasuuvoq, taanna oqarpoq.

Imaluunniit nipitittakkap oktobarimi saqqummiunneqarnerani nammineq Facebookimi allanneratut.

- Una juullimi tupinnartuliaanngippat, taava tupinnartuliaqarsinnaanngilaq.

Kiinaanni qaamaneq
Juullip Nipitittagaata aamma oqallisaalernissaa anguniarpaa, taamaalillunilu atornerlunneqarsimasunut neriuuteqalersitsilluni.

Meeqqat siunissaraagut, paarilluartussaavagut. Ingammillu meeqqanut paarinerlunneqartunut juulli pitsaanerutissavarput, Frida Waaben oqarpoq.

Gukki Nuka siorna eqqumiitsulianik saqqummersitsinermini 'Revner i Sjælen'-imi saqqummerpoq, tassani siullermeerluni meeraanermini atornerlunneqarsimanini oqaluttuaraa.

Juullip nipitittagaanik saqqummersitsinerup oqariartuutaa, tassa atornerlugaasimanerup illuani inuuneqartoq ingerlateqqinniarpaa.

- Assilissani meeqqat kiinaanni qaamaneqarpoq. Taartumi qaamaneqarpoq, neriulluarniarneq aamma neriunneq, Gukki Nuka oqarpoq.

Inuuneq qaamaneqartoq
Tassanilu aamma meeqqanut atornerlugaasimasunut taarsiortut ilaannut, juullip nipitittagaa allakkanik nakkaatitsivikkut imaluunniit mailikkut angusinissani neriuutigaa.

- Siullertut kisimiinnatik paasissavaat.

- Aappaattut immaqa inununermi ingerlaqqinnissamut neriunnermik neriulluarniarnermillu annikitsunnguamik tunineqassapput.

- Kingullertullu neriuutigaara, saqqummersitsinera assigalugu atornerlugaasimanerup ikinngutinut, angajoqqaanut imaluunniit inersimasunut toqqissisimaffigisanut oqaluttuarnissamik sapiillisitsinermik kinguneqassasoq. Taamaalilluni illuani aamma pitsaasumik peqarneranik qaamanermik upperinnilerniassammata. Taamaalillutalu tarnikkut ajornartorsiutitik annertuut pissutigalugit imminut toqunnikkut imaluunniit imigassamik, ikiaroornartumik pinerlunnermulluunniit saatsinngitsoorsinnaassagatsigit.

Aningaasaateqarfiullu juullimi oqariartuut taanna ingerlateqqikkusuppaa.

- Meeqqanut assigiinngitsunik pissuteqarlutik tunuliaqutaat peroriartorfiallu apeqqutaatinnagu ikiortariaqartunut asannittumik maluniarnerusariaqarpagut. Taamatut tunngavilerlugu juullip oqariartuutaa tamanut inissaqartitsilluni oqariartuut kusanartuusoq isumaqarpugut, Agusta Jeremiassen, juullip nipitittagaata saqqummiunneqarnerani oqalugiarnermini taama oqarpoq.

Juullip Nipitittagaa Tele-Postimi pisiarineqarsinnaavoq. Digitaliusoq nittartakkami juulli.gl-imi pisiarineqarsinnaavoq. Danmarkimi ilaatigut Schultz Boghandelimi aamma Kalaallit Illuutaanni pisiarineqarsinnaavoq.

GUKKI NUKA PILLUGU OQALUTTUAQ AAMMA ATUARUK:

Ullumikkut imminut qissatigineq ajorpunga, meeqqaalli pillugit qiasarpunga

Assi.: Gukki Nuka
Assi.: Gukki Nuka
Assi.: Gukki Nuka
Assi.: Gukki Nuka
Seneste nyheder / Nutaarsiassat kingulliit