Juullip inua Islandimeersoq Kulusummut tikeraapallattoq

Juullip inua Kalaallit Nunaanneersoq meeqqat tamarmik nalunngilaat - Uummannap eqqaaneersuuvoq. Aammalu tuttunik qimuttulerluni tingilluni aggertartuusoq.

Juullip inua Kulusummi meeqqanut poortukkanik pajuttoq allaanerusimagunarpoq. Taanna avannaaneersuunngilaq, kisianni kangianeersuuvoq, taassumalu angallatigisartagaa aamma allaanerulluni.

Tamatumali tikeraarnera meeqqat nuannaarnerannut ajoqutaanngilaq, Nathalie Holmip, Kulusummi atuarfimmi ilinniartitsisup oqaluttuarnerani tamanna atuarneqarsinnaavoq, taanna aaqqissuisoqarfimmut nassiussivoq.

- Kulusummi atuartunut juullip inuata poortugarpassuarnik kusanartunik nassarluni Islandimit tikinnera nuannernerpaavoq, ullormi pisunik oqaluttuarnerani tamanna atuarneqarsinnaavoq, atuarfik tassani juullerpaluttunik sammisaqarpoq.

Tassami ulloq luciartoqarneranik aallartippoq, tassani angajoqqaat, ilinniartitsisut nunaqarfimmilu innuttaasut isiginnaarlutik peqataapput. Kingorna atuartut qiortaallutik juullerpaluttunik atuarfimmi klassini kusassaasersuipput.

Mittarfiliartoqarporlu.

- Juullip inuata tikeraarnera akunnermik ataasiinnarmik sivisussuseqarpoq, juullip inua tikinnermini timmisartumut ilaaffimminut ilaalluni ingerlaqqittussaammat, Nathalie Holm oqaluttuarpoq, taassuma juullimi nuannaarneq Sermitsiaq.AG-p atuartartuinik avitseqatigerusuppai.