assammik arsaanneq
Juullimut unammiuaarneq ingerlanneqartoq
Brugseni Julecup 2016 sapaatip-akunnerata naanerani ingerlanneqarpoq
Ukiumoortumik assammik arsaalluni pissartanngorniunneq, Brugseni Julecup, GSS aaqqissuisoralugu Nuummi Inussivimmi sapaatip-akunnerata naanerani aallartinneqarpoq.
Arnat pissartanngorniunneranni holdit pingasut peqataapput, GSS, Illoqarfimmeersut aamma QNA. Kingulliit taakkartorneqartut unammisartut amerlanersaat Danmarkimi ilinniartuupput, taakkulu angerlalutik juullisioriartuupput.
GSS marlunnut avinneqartoq
GSS nukittoqqatigiinngajanngorlugit marlunnut avinneqarsimavoq, GSS aamma Illoqarfimmeersut. Taamatut amerlanerusut unamminermik misilittagaqalernissaat eqqarsaataavoq. Weekendimilu taakkorpiaat unammipput.
Unamminerlu naligiiffiuvoq, GSS-ip arnartaat 30-28-imik ajugaapput, Illoqarfimmeersut muminnermi 11-14-imik siuaqqareersullu.
- Taamatut avinneqarnerisigut uninngaannarlutik anisimanermut sanilliullugu amerlanerit takutitsisinnaanngorput, GSS-it sungiusaasuat Kim O. Petersen oqarpoq.
- Tamarmik unamminissaat pingaaruteqarpoq. Unammineq holdinut tamanut pitsaavoq.
Angutini inernerat ersarissoq
Angutinili NÛK aamma GSS-ip akornanni unamminerup inernera pissanganartortaqarpallaanngilaq. NÛK-mi isaatitsisartoq Gustav O. Egede unamminermi amigaatigineqarpoq.
GSS-ip unammisartui amerlasuut taarseraallutik unamminerup annerpaartaani sukkasuumik ingerlatsipput, tamannalu unammisaasa NÛK-meersut malinnaaffigisinnaanngilaat.
Unamminermi kusanartunik isertitsisoqarlunilu annaassisoqartarpoq. Ullormili torrallaasoq NÛK-meersumut Chresten Rossen Bjørn immikkut taaneqartariaqarpoq, taassuma nunanut allanut unammisartut GSS-ip illersuisui salloqittarlugit titarnerup killinganut timini tunoqqullugu tunniukkamiuk.
Unammineq 35-15-imik naammassivoq, muminnermi 17-7-eqqareerlutik.
Brugseni Julecup 2016-imi immikkoortup aappaa 27.-29 decembari Inussivimmi ingerlanneqassaaq