Juullimut inuulluaqqusinermi DR kaffisortitsissaaq

Kalaallit Nunaata Danmarkillu akornanni juullimut inuulluaqqusisoqartillugu aatsaat iluamik juullertarpoq.

Kalaallit Nunaannut juullimut inuulluaqqusineq ukiut 80-it sinnerlugit suli ingerlanneqartartoq, aliikkutassiani suli ingerlanneqartartut pisoqaanersaavoq.

Ataatsimoorfiit pingasut
DR1-ip decemberip 18-ni aliikkutassiaq Konservatoriets Koncertsalimit aallakaatilerpassuk, Danmarkimi piffinni arlaqartunit aallakaatitsinermut peqataasoqarsinnaassaaq.

Kalaallit Danmarkimiittut, innuttaasut kalaallinik qanigisallit aammalu allat Kalaallit Nunaannut tunngasumik unnussiuaarusuttut DR Odensemi, Aalborgimi aamma Københavnimi kaffisortitsilerpat ulitallerlunilu peqataasinnaapput.

Aamma atuaruk: Sisimiut nunaqarfiinut juullimi tunissutit

Illoqarfinnit pingasunit tamanit nutaamik aallakaatitsisoqassaaq, DR Eventimi suliniummik aqutsisoq Betina Leth oqaluttuarpoq.

- Ukiuni arlalinni aliikkusersuineq immiunneqartillugu Københavniliaqqaarluni inuulluaqqusisoqarsinnaasarpoq. Kisianni illoqarfinni allani kalaalerpassuit najugaqarput, taamaammallu ukioq manna kalaallit Aalborgimiittut Odensemiittullu ilaquttaminnut inuulluaqqusinissaannut periarfissippagut, taanna oqarpoq.

Aaqqissuussilluarnissamik neriuttut
Amerlasuut ilaquttatik juullisioqatiginissaannut periarfissaqanngillat, naak piffissaq tamanna ilaquttanik qanillisitsisaraluartoq.

- Neriuppugut kalaallit Danmarkimiittut ataatsimoornissaannut aamma nutaanik nalunngeriikkanillu naapitsinissaannut periarfississallutigit, eqqarsaatillu nunamut avannaaniittumut saatsillugit, Betina Leth oqarpoq.

Provinsimit aallakaatitsisoqassaaq
Aliikkusersuineq decemberip 18-ni immiunneqassaaq Odensemut, Aalborgimut aamma Københavnimut attavilerlugu, sapaammilu decemberip 20-ni DR1-ikkut aallakaatinneqassaaq.

Kalaallit Nunaannut juullimut inuulluaqqusineq decemberip 18-ni Musikkonservatoriets Koncertsalimi Københavnimi, Europahallen Aalborgimi aamma Odensemi Nordatlantiske Husimit.

Ukioq manna programmi uani atuaruk