Timmisartuussineq
Juullikkunnili kinguaattooqqasut apuuffissaminnut apuupput
Ippassaq unnukkut ilaasut kingulliit Upernaviup eqqaani apuuffissaminnut Air Greenlandimit apuunneqarput. Juullimili ilaasut apuunnissaat ajornartorsiutigineqarpoq.
Juulli 2017 timmisartumut ilaasut 132-t ingammik puigornavianngilaat. Tassami ullorpassuarni Upernaviup eqqaani apuuffissaminnut apuunnissartik utaqqisariaqarsimavaat, Air Greenlandip qulimiguuliminik ajornartorsiornera silarlunneralu pissutaallutik. Inuit qulit sapaatip-akunnerini pingasuni apuunniarsarisimapput.
S-61-mit ikiorneqartut
Maanna ilaasut tamarmik kiisami apuussimalertut Air Greenland nalunaaruteqarpoq. Minnerunngitsumik Issittumi Sakkutooqarfiup qulimiguuliutaa S-61 ikiuummat, taanna nalinginnaasumik annaassiniarnernut ujaasinernullu atorneqartarpoq.
- Atuisugut, Namminersorlutik Oqartussat, Issittumi Sakkutooqarfik, Angallannermut- Ineqarnermut Sanaartornermullu Aqutsisoqarfik uagullu nammineq mittarfitsinni sulisut timmisartunilu inuttaasut annertuumik qutsavigaagut. Tamarmik suleqatigiissinnaassutsimik naamagittassutsimillu annertuumik takutitsipput. Pisoq ajornaatsuinnaasimanngilaq maannalu naliliiviginissaa kinguleruppoq, Air Greenlandimi niuernermut pisortaq Maliina Abelsen oqarpoq.
Pisup ajornerpaaffiani ilaasut 132-it timminissaraluit taamaatinneqarnerannit eqqugaapput, taakkunanngalu qulit sapaatip-akunneri pingasut sinnerlugit utaqqisimallutik. Pissutsit ajornanngippat pinngitsoortinneqarsinnaagaluit tulliani ukiuunerani angallassinissamut aaqqiissuteqarfigisinnaajumallugit Air Greenlandip maanna pisoq naliliivigisussanngorpaa.
Nutaanik qulimiguulinnik piumasaqaat
Timmisartortitseqatigiiffik qulimiguulinnut qularnaannerusunut Air Greenland aningaasaliissuteqarnissaa ilaannit piumasarineqareerpoq, taamaalilluni teknikkikkut ajornartorsiuterpassuit atuisunut eqquisut pinngitsoorneqassammata.