Justus Hansen: Oqaatsit pillugit immikkoortitsineq unitsilluinnarli

Demokraatit qinigassanngortitaata imminermit aallaaveqarluinnartumik ilanngussamini oqaatsit pillugit oqallinnermi kusanarnerusumik oqallinnissamut kaammattuivoq

Oqaatsit pillugit oqallinnermi qanoq inisissimaffik apeqqutaatinnagut, una ataaseq isumaqatigiissutaasariaqartoq, Justus Hansen (D) isumaqarpoq:

- Ikioqatigiilluta anguniartigu oqaatsit pillugit immikkoortitsineq qanorluunniit oqaaseqaraluarutta, taanna taama ersarissumik oqarartuuteqarpoq.

- Tamatuma inupalaanngortippaanga?

Ajornartorsiutip oqaluttuarinerani Justus Hansen nammineq inissisimaffini aallaavigivaa.

- Kalaallitsut, tuluttut danskisullu oqaaseqarpunga. Kalaallisulli oqallorippallaanngilanga. Taava inupalaajuvunga imaluunniit sullarluttuuvunga? Uanga isumaqarpunga taamaanngitsoq.

- Ajoraluartumik allaanngilaq nunatsinni assigiinngitsunik oqaasillit avissaaraluttuinnartut.

Taassuma isaanit oqaatsit assortuunnermut atorneqarpallaarput.

- Kikkut tamat oqartussaaqataanerat tunngavigalugu ingerlavugut, taamaakkaluartoq apersuusersorneqartarpoq danskisut oqaasillit ilumut Inatsisartuni oqaatsitik atorlugit oqaaseqarsinnaatitaassanersut.

- Kalaallit Nunaanni inuuvugut, taamaakkaluartoq kalaallisut oqaasilinnut ajornarsinnaasarpoq ilinniakkamik naammassinninnissaq, atuartitsissutit tuluttut danskisullu naqitaasarmata.

Kalaallisut, tuluttut aamma qallunaatut

Oqallinneq kusanarnerusariaqartoq, taanna isumaqarpoq.

- Akuttunngitsumik oqarfigineqaannartarpugut oqaatsinik ilinniassasugut.

- Kisianni paasilaariarsiuk; imaaliallaannarneqarsinnaanngilaq. Uanga nammineq kitaamiusut oqalukkusuttaraluarpunga. Soorunami.

- Aamma qularinngilara inuusuttut tuluttut danskisullu oqalussinnaanngitsut kissaatigisassagaat tuluttut danskisullu oqaluttarnissartik, ilinniarnissaminnut periarfissarissaarnerujumallutik imaluunniit internetimi aliikkutassanik allanillu atuisinnaanerujumallutik.

Oqaatsitigut piginnaasat amigaatigisat isornartorsiuinnarnagit, angajoqqaat, paaqqinnittarfiit, atuarfiit, suliffeqarfiit ataatsimut kinguaariit tulliuttut kalaallisut, tuluttut aamma qallunaatut oqalussinnaanissaat suliniutigisariaqaraat, taanna isumaqarpoq.

Powered by Labrador CMS