Kommuneqarfik Sermersooq

Justus Hansen Sermersuumi borgmesterimut tullersortinngorpoq

Kommuneqarfik Sermersuumi kommunalbestyrelsimut sinniisussat marluk, ilaasortat allat marluk Inatsisartunut qinersisoqareernerani tunuarmata, kommunalbestyrelsimi ilaasortanngorput

Kommuneqarfik Sermersuumi borgmesterip tullersorteriligaa, Demokraatineersoq Justus Hansen

Demokraatit aamma Inuit Ataqatigiit Kommuneqarfik Sermersuumi kommunalbestyrelsimi sinniisissaat, Demokraatineersoq Poul Hansen aamma Inuit Ataqatigiinnersoq Charlotte Ludvigsen, Kommuneqarfik Sermersuumi kommunalbestyrelsimi ilaasortanngortinneqarsimapput.

Tamanna kommunalbestyrelsi januaarip 27-ani ataatsimiimmat pisimavoq.

Ilaasortanngortinneqarnerat pivoq Demokraatineersup Anda Uldummip, aamma borgmesterimut tullersortaasimasup, kiisalu Inuit Ataqatigiinnersup, aamma Isumaginninnermut, Suliffeqarnermut Inuussutissarsiornermullu Ataatsimiititami siulittaasuusimasup, Inatsisartunut qinersisoqareerneratigut kommunalbestyrelsimi ilaasortatut tunuarmata.

Ataatsimiisitaliani siulittaasut aamma nutaat
Kommuneqarfik Sermersuup nalunaaruteqarnera naapertorlugu Demokraatineersoq Justus Hansen, parteeqatini Anda Uldum kingoraarlugu borgmesterimut tullersortinngussaaq, taassumalu saniatigut Inuit Ataqatigiinnersoq Naja Lund aamma Demokraatineersoq Poul Hansen kommunalbestyrelsimi inissititeqqinnerup kingorna ataatsimiisitaliani siulittaasunngortut.

Demokraatineersoq Poul Hansen Meeqqanut, Ilaqutariinnermut Atuarfeqarnermullu Ataatsimiititami siulittaasunngortoq, Inuit Ataqatigiinneersoq Naja Lund Isumaginninnermut, Suliffeqarnermut Inuussutissarsiornermullu Ataatsimiititami siulittaasutut inissippoq.

Powered by Labrador CMS