Naligiissaarineq
Justus Hansen: Nuuk iluatsissaqqaarpoq, tunumulli ajornerpaassaaq
Kommuneqarfik Sermersuumi Demokraatit sinnerlugit kommunalbestyrelsemi ilaasortap naligiissaarinissamut siunnersuutip kinguneriumaagassai pillugit ernumavoq
Justus Hansenip Demokraatit sinnerlugit kommunalbestyrelsemi ilaasortaasup qularinngilaa naligiissaarinermut siunnersuut akuerineqassappat Nuuk iluatsissaqqaartoq. Aarleqqutiginerpaavaali sumiiffiit inukitsut tunumi Paamiullu eqqugaatinissaat. Taamaammat Justus Hansen kaammattuivoq naligiissaarinissamut siunnersuutip isumaliutigeqqinnissaanut.
Kommuneqarfik Sermersooq Nuummiit, tunumut Paamiunullu kommuniusoq naligiissaarinermut siunnersuut akuerineqassappat ukiumut 56 millioner koruuninik annaasaqartussaavoq, siunnersuut nunamut namminermut aningasaqarnermullu naalakkersuisup Vittus Qujaukitsup Siumumeersup siunnersuutaa atuutilissappat.
Tunu Paamiullu eqqugaassapput
Justus Hansen tusagassiutinut nalunaarummini allappoq kommunet kattunnerisa kingorna innuttaasunik sullissineq tunumi pitsanngoriaateqarsimagaluartoq.
- Kisianni aallaanngivippoq Vittus Qujaukitsup namminersorlutillu oqartussat pitsaanngitsumik inissisimaqqilernissarput kissaatigigaat, Justus Hansen oqarpoq.
Taanna naliliivoq siunnersuummik Nuuk aniguissaqqaartoq. Siunnersuutilli sunniutai pitsaanngitsut sumiiffinni allani malunniukkumaartoq, Justus Hansen isumaqarpoq.
- Uagut Kommuneqarfik Sermersuumi sumiiffinni allani najugaqartuusugut, naligiissarinermi periuseriniarneqartoq maluginerussavarput. Maani tunumiittugut, Paamiuniittut nunaqarfinnilu tamani najugallit – tassaavugut naligiissaarinermi aaqqissuusseqqinissami saqqummiunneqaqqammersumi, naapertuilluanngitsumik akaareqatigiinngitsumillu pilliuteqartussanngortut, Justus Hansen oqarpoq.
Taanna Kommuneqarfik Sermersuumi borgmesterimit Asii Chemnitz Narupimit Inuit Ataqatigiinneersumit ilalerneqarpoq.
- Tasiilap,Paamiut Ittoqqortoormiillu qaffassarnissaat ilungersuutiginikuuara, isumaqarama kommunimi akaareqatigiittariaqartugut, kisianni aningaasaqarneq maannakkutut isikkoqalersillugu, taamatut suliaqarnerput ajornakusoornerulissaaq. Tamanna ajuusaarnarpoq, naligiissaarinermillu nutarteriniarnerup tamanna kingunipilugissavaa, Asii Chemnitz Narup tusagassiutinut nalunaarummi allappoq.
Naligiissaarinissamut periussisatut siunnersuut suli akuersissutigineqanngilaq. Kommuneqarfik Sermersooq aamma Qeqqata Kommunia siunnersuutip ullumikkut iluserisaanut isumaqataanngillat. Naatsorsuutigineqarpoq naligiissaarinissamut periusissaq pillugu aggustip aqqarnat nallertinnagu isumaqatigiissusiortoqareersimassasoq.