imigassaarniarneq

Justus Hansen: Imigassamik tunisiunnaarniarneq ajornaatsumik aaqqiipallanniarneruvoq

Inatsisartunut ilaasortap Justus Hansenip (D) Tunumi imigassamik tuniniaajunnaarallarnissamik Steen Lyngep (A) siunnersuutaa tapersinngilaa

Tunumi imigassamik aalakoornartulimmik tuniniaanerup unitsikkallarneratigut inuuniarnermi ajornartorsiuterpassuit aaqqiivigineqarnissaanut iluaqutaassasoq, Steen Lyngep (A) qanittukkut siunnersuuteqarfigaa.

Inuit Ataqatigiit Kommuneqarfik Sermersuumi kommunalbestyrelsimut ilaasortaatitaata, Malene Lyngep, Atassummi politikerip oqallissaarutaa KNR-imi isornartorsiornikuuaa, tamanna Tunumi ajornartorsiutinut aaqqiissutaannginnerarlugu.

Atuaruk: Tunumi imigassamik tuniniaaneq unitsikkallarneqarnissaa siunnersuutigigaa

Atuaruk: Atassut: Imigassaq pillugu oqallisissiaq IA-p paatsoorpaa

Piffissami sivisunerusumi iluaqutaanavianngitsoq
Demokraatineersoq Justus Hansen, Tasiilami najugaqartoq, siunnersuummut aamma tapersiinngilaq.

- Steen Lyngep imigassaq matuneqarnissaanut siunnersuutaa eqqarsaatigilluagaanngittumik aaqqiiniarneruvoq, piffissaq sivikitsup iluani iluaqutaalaartussaq, piffissarli sivisunerusoq iluaqutaanavianngitsoq, taanna tusagassiuutinut nalunaarummi allappoq.

Taassuma erseqqissaatigaa, Kangiani kimittuunik niuerneq inerteqqutaareermat. Meeqqat illersuisuatalu Aviâja Egede Lyngep nalunaarusiaata tamanna iluaqutaasimanngitsoq takutikkaa.

Atuaruk: Meeqqat Illersuisuat: Maannakkorpiaq iliuuseqartoqartariaqarpoq

Suliffissat amerlanerusut
- Siunnerfigisariaqarparput siunissaq ungasinnerusumut ajortumik ineriartornerat mumisinnissaanut. Demokraatinit ilimagaarput inuuniarnermut atugassarititat inooriaasermullu pitsanngortinnerisigut aqqut pitsaanerussasoq.

Kangiani suliffeqarfiit atugassarititaat pitsanngorsarnissaat suliffeqarfiit amerlisarnissaanut siunertalik, aqqut ajornannginnerpaasoq isumaqarpoq. Taamatut innuttaasunik suliffissaqalersitsisoqassammat.

- Taamaattumik suliffeqarfiit akileraarutaat milliniarparput, suliffeqarfiit iluanaarutaat ineriartornerallu periarfissaginnerutikkumallugit, suliffissanik isumannaarinnissinnaasut. Aammattaaq suaarutigeqqinniarparput sukkanerpaamik Tasiilami mittarfissaq sananeqarnissaa, taanna allappoq.

Atuaruk: Justus Hansenip Tasiilami mittarfeqalernissaa piumasaraa

Allaanerusumik iliuuseqarneq
Justus Hansenilli suliffinnik pilersitsineq kisimi naammanngitsoq ilisimavaa.

- Isumaginninneq aamma isigisariaqarparput, taamatullu sutigut allaanerusumik qanoq iliuuseqarsinnaanerluta misissorlugu, pinaveersaartitsineq katsorsartinnerillu eqqarsaatigalugit. Maannakkumut suliniutigineqartut naammappat, immaqaluunniit allanngortittariaqarnerpavut, Justus Hansen aperivoq.

Piffiit meeqqanik sumiginnaanermik ajornartorsiorfillit eqqarsaatigalugit tamakku aaqqiinerit ajornanngitsut iluaqutaanngitsut unitsillugit pitsaasumik ineriartortoqarnissaa siunertaralugu aaqqiniartoqartariaqartoq, taanna isumaqarpoq.

Powered by Labrador CMS