Qisuariaat
Juliep Kbh ZOO iserfigiumajunnaarpaa
Erinarsortartoq Julie Berthelsen Københavnip uumasuusivissuata qungasersooq Marius toqunnera aalassassimarutigeqaa
Erinarsortartup tusaamasap kalaallip Julie Berthelsenip Københavns zoologiske havemi qungasersuup Mariusip toqunneqarnera isumaqatiginngilaa.
- Allanik periarfissaqannginnera eqqortuusinnaanngilaq! Julie Berthelsen sapaatiumma aalassassimaaqaluni Facebookimi allappoq.
- Ajuusaarpunga kisianni Kbh Zoo matumuuna iserfigiumajunnaarpara. Tamanna politikkikkut isummersornerua? Ajunngilaq, politikkikkut isummersuutit ilissi ZOOmittut isiginiarniarsigit, ilissimi uumasunik paarsisuuvusi aalajangersaanerpaasinnaallusilu, erinarsortartoq allappoq.
- Uani isumatusaassuseq imaluunniit illuatungerisaa tusaajumanngilakka. Tamannami ajorluinnarmat, Julie Berthelsen allappoq.
Julie Berthelsenip allataminut atuartartumi qisuariaataat atuareerlugit Københavnip uumasuusivissuata iliuusaanut paasinninnerulerpoq.
- Qungasersooq toqunneqanngikkaluarpat uumasuusivissuaq avataaniit nersussuarmik imaluunnit puulukimik pisinniassagaluarpoq, taama oqaaseqartut ilaat allappoq.
Uumasuutiviit mianernartut
Uumasuusiviit uumasunik naalliutitsiitigalutik uumasut nungutsaaliorpaat, taama Julie Berthelsen ullumi Sermitsiaq.AGmut oqarpoq.
- Uumasuusivissuit uumasunik naalliutitsiigalutik nungutsaaliuisuupput. Eqqatugaq mianernartuuvoq taamaammallu maanna eqqarsaatigilluaqqaarallassavara arlaannaannulluunniit isumaqataanianngikkallarpunga, Julie Berthelsen oqarpoq.