angajoqqaajuneq
Juliep kakkik milluttarpaa
Erinarsortartup Julie Berthelsenip kalaallit ileqqutoqaat atortarpaa ernini sorlumminik milikartooraangat
Atortulersunngikkaluarluni imminulli atuinnarluni naalugiarsuit sorlummik milikartoornerat iluarsineqarsinnaavoq. Tamanna Julie Berthelsenip atuagassiamut Vores Børnimut oqaluttuaraa. Namminermigooq silamut anersaarluariarluni ernermi kakkia millullugu iluarsisarpaa.
Mikisunik meeralippassuit misigisarpaat asasaaqqat sorlummik milikartoornerat allaat kleenexit iluaqutaajunnaarfigisaannik. Meeralinnut atugassiap Vores Børnip atuartartuni isumassarsiorfissippai Julie Berthelsen iluaqutigalugu – kalaallit ileqqutoqaata atornissaa merserissanngippassuk.
- Mikisunnguutillutimmi namminneq kakkissinnaaneq ajorput. Taamaammat qanermik kakkiat millunneqartarpoq! Anaanama aqqaluara meeraanerma nalaani taama pisarnikuuaa, isumaqanngisaannarsimagaluarpungali nammineq taamaasiortalissallunga. Tassami siornatigut kakkik, nuak anarlu maajugisupilussuugaluarpakka, Julie Berthelsen Vores Børnimut oqaluttuarpoq.