qinersineq 2014

Julie Rademacher qinigaaffiginikuusaminit taperserneqarpoq

Novemberip ulluisa 28-anni qinersiartorutta aatsaavissuaq siornatigut qallunaat folketingianiissimasumik, Danmarkimi qineqqusaarnikuusimasumik, nunatsinni qinersisinnaalissaagut. Julie Rademacher 2007-miit 2011-ip tungaanut Socialdemokratit sinnerlugit folketingimut ilaasortaasimavoq, qinersivimmilu Koldingimilu kingoraartigisimasaata qinigassanngortinnera taperserpaa

Julie Rademacher, Christian Rabjerg Madsen, Christiansborg
Christian Rabjerg Madsen: – Quluarutiginngilara Julie Siumumut iluaqutaalluassasoq. Aajuku marlunngornermi novembarip 11-anni Christiansborgip saavani.

Julie Rademacherip qinigassanngortitaasinnaanera 2011-mi Kolding Socialdemokratinit Christian Rabjerg Madsenimut tunniunneqarpoq. Taanna sassarpoq parteeqammilu qinigassanngortinnera taperserpaa, taanna ulluni makkunani Danmarkimiittoq Københavnimi Aarhusimilu Kalaallit Illuutaat pulaarlugit.

– Julie ukiorpaalunni ilisarisimavara, Socialdemokraatinilu folketingimilu sulisimanera nuannaartoreqaakka, minnerunngitsumik Koldingimik sullissisimanera nuannaartunaqaaq. Julie Siumumi ataatsimoortitsisinnaassutsimigut malunnaateqarnissaa ilimageqaara, nukittorsaasinnaassusaalu qularnanngilartaaq. Socialdemokratit Siumukkullu ataatsimoorsinnaanissaannut tapersersuisinnaaginnarani, aammali inuit akornanni ataatsimuulersitsisinnaanera qularinngilara, Christian Radbjerg Madsen oqarpoq.

Julie Rademacher kiisalu Christian Radbjerg Madsen marlunngormat ullaakkut naapipput, qineqqusaarnermut politikkimullu tunngasunik isummersoqatigiinniarlutik.

– Socialdemokratitutoqaavunga taamaasillungalu Siumukkormiuullunga. Qinersivigisimasannit tapersersorneqarnera nuannaarutigeqaara, nalunngilaralu isummersueqatissaqartuartarumaarlunga Christian eqqarsaatigalugu, siornatigummi misilittagaqarfiginikuuvarput peqatigiiffiginikuullugulu, Julie Rademacher oqarpoq.

Christian Radbjerg Madsenip qineqqusaarnerani Julie Rademacher pingaaruteqangaartunut peqataalluinnarsimavoq, tassami Lars Løkkep 2011-mi qinersinissamik nalunaarutiginninneranit ullut sisamaannaat sioqqullugu Julie Rademacherip Folketingimiut qinersinermi qinersivia Christian Rabjerg Madsenip tiguvaa. Taamanikkut Julie ernerminik siullermik, Carl, naartusoq. Qaammatit pingasuinnaat matuma siornatigut aappassaa ernertaarpoq, Victor Nanoq, taannalu Danmarkimeeqatigaa.

– Neriuuppara Julie qinerneqarluarumaartoq, siunissamilu suleqatigiilluarnitta ingerlatsiinnarsinnaanera neriuutigaara, aamma partiit taakkua akornanni suleqatigiinnissaq qilanaaraara – Sapinngisarput tamaat maanngaanniit tapersersussavarput, Christian Rabjerg Madsen oqarpoq.

Julie Rademacher pillugu annertunerusumik paasisaqarusukkuit Sermitsiaq tallimanngormat saqqummersup soqutiginartorujussuarmik kalaallinik tunuliaqutaqarnera pillugu apersorpaa, ilaatigullu arnilu angunni persuttaasartoq qimarratigisariaqarsimavaat.

Powered by Labrador CMS