Navnligt
Julie Berthelsen Odense Idrætshal-imi scenemi
Arfininngormat ualikkut Fyn-imi Timersullammammik toqqaasoqarmat kalaallinik peqataasoqarpoq
Aaqqissuussinersuaq arfininngormat Odense Idrætshal-imut hal-inullu eqqaaniittunut soqutiginnittunik tusintinik arlalinnik ussatsitsisoq ateqarpoq Sportslørdag.
Inuppassuit fynimi timersullammaat naapippaat timersuutill assigiinngitsut misilillugit. Fynimi timersullammaat freerput klub-illu kakkannerit 25-t takutitsiviini, ulloq taanna pillugu inissinneqarsimasuni, tikilluaqqusillutik.
Soorunami aaqqissuussinersuarmi GOG peqataavoq. Ilaatigut Minik Dahl Høegh aamma Akutaaneq Kreutzmann. Taakku autograf-inik atsiorlutik ulapipput soqutiginnittunillu arsaqateqarlutik.
GOG kusanartumik assammik arsartarnermigut Håndboldliga-milu inissisimalluarnermigut kikkunnik tamanik tupaallatsitsisimavoq, Gudme-miullumi marlunnik nersornaatisipput. Tassa ukiumi piukkunnaatilittut toqqarneqarmat backi talerperleq sakkortoorujussuarmik isertitseriartartoq Nicklas Kirkeløkke, aammalu ukiumi timersortut siuttuattut GOG-p ukiorpassuarni siulittaasua Poul Syberg toqqarneqarluni.
Julie Berthelsen
Julie Berthelsenip, Vietnam-imi feeriallatsiareeersimalluni uteqqammersup, siullermeersumik fynimiut nipilersoqatigiivi 20-nik inuttallit Tip Toe Bigband appisimaaqatigai. Julie Berthelsen nipilersullammannik nipilersortoqarluni erinarsorluni nuannisarpasissorujussuuvoq. Tusarnaartorpassuillu ersaattaannerannit tusaaneqarsinnaavoq aamma Julie Berthelsen nuannarineqarluartoq. Minnerunngitsumik fynimiu rappertartoq UFO erinarsoqatigimmagu tusarnaartut nuannareqaat.
Fynimi 1950-imiilli ukiumi timersullammammik toqqaasoqartarsimavoq, ukioq mannalu toqqarneqarpoq pisissaarluni nunarsuarmi pissartaq Maja Jager.