Julie Berthelsen kusanarsarluni suliaritippoq

Erinarsortartoq, atuakkiortoq aamma bloggertartoq Julie Berthelsen, arnarpassuit allat 36-t missaani ukioqartut assigalugit malugisinnaallugulu takusinnaavaa inuusuppallaarunnaarluni.

Julie Berthelsenillu tamanna ataatsimut igigalugu ajunngivissoraa. Kisiannertaqarlunilu.

Eqinganeq ataaseq Julie Berthelsenip artorsaatigisimavaa. Allaat amerissaasarfimmi kusassartilluni suliaritissimallugu.

Eqinganeq qatsukkaa
Julie Berthelsenip tamanna bloggimini ilanngutassiilluni allaaseraa:

- Pisariunngitsumik pissuteqarluni Restylanerpunga, 'aliasunninnut' botox atussallugu pisariaqanngimmat. Tamanna piffissap ingerlanerani pisariaqalersinnaavoq - tassami 'aatsaat' 37-iliilerpunga (7. juuni), kisianni ukioq ataatsip-marluk kingulliit ingerlanerini eqinganeq, qalluukka eqikkaluarukkit eqinngikkaluarukkilluunniit uanga isinnik itersannguuppoq. Tamannalu uanga qatsuppara, Julie Berthelsen allappoq.

Immaqa suliaritinnerit allat
Restylane qaqumut atuuttussatut ulikkaarutaanngilaq, taanna annertut hyaluronsyrimik akoqarpoq. Hyaluronsyre ipinitsinni nassaassaavoq, amitsinniittorlu imerpalasoq atatilersinnaavaat, taamaalilluni ulikkaarusiisinnaalluni.

Restylanemik kapitinneq qaammatit arfinillit arfineq-pingasullu akornanni atasussatut naatsorsuutigineqartarpoq.

Naammagisimaaraa
Julie Berthelsenip oqaluttuaraa, kiinnami utoqqaliartornera naammagisimaarlugu, kisiannili immaqa kusassarluni suliaritikkusussinnaavoq.

Meeqqani marluk milutsissimanngikkaluarpai, kisianni naartunermini 25 kiilut aamma 28 kiilut atisimavai.

- Tamatuma timera ameralu sorpassuartigut sunnerpaa! Iviangikka aamma sunnerpai. Kiilut qulit aqqaneq-marluk kingulliit katannissaanut amigaatigisakka katareeriarukkit, taava takujumaarpara. Immaqa kivitsinnissannut annikitsumik pisariaqartitsissaanga, immaqa immertilaarlugit. Piffissami tassani takujumaarparput, Julie Berthelsen bloggimini allappoq.

Botox, qallut aamma iviangiit
Taassuma inuit nakorsanik imaluunniit amerissaasartunik ikiorteqarlutik suliaritittartunik assuarinnittartut ataatsimut isigalugu nuannarinngilai. Inuit nuannaalersippagit ajorinngilaa.

- Inuit allat qanoq iliornerannut imaluunniit iliorusunnerannut akuliunnavianngilluinnarpunga. Arnanik ikinnguterpassuaqarpunga, assersuutigalugu iviangiminnik suliaritinnikunik. Taakku nuannaalersippaat, tamannalu uanga iluaraara. Nammineq iliuutsitik aalajangiiffissaraat, tamatumunngalu nammineq inuttut taamaliornissatsinnut pisinnaaffigigatsigu nuannaraara, Julie Berthelsen isumaqarpoq.

Julie Berthelsenip ilanngussaa tamakkerlugu boggiani atuarsinnaavat.