Københavnimi toqusoq
Julie: Angut kalaaleq toqusoq kinaassusersiorneqanngilaq
Københavnimi kalaallip angutip toqunera Julie Berthelsenip aamma tupaallaatigaa
- Pisoq alianarpoq uggornartorujussuullunilu. Angutip toquneranut misiginneqataavunga, ambulancemi sulisut aamma misiginneqatigaakka. Aammami taakku ajuusaarput. Angerlarsimaffeqanngitsuunini toqqutiginngilaa, aamma ikiorneqaraluarpoq. Ajutoortoqarnera pissutigalugu toqukkut qimaguppoq.
Erinarsortartoq Julie Berthelsen EkstraBladet.dk-mut oqarpoq.
Angut kalaaleq 32-nik ukioqartoq Amagerbro Stationimi Københavnimi ataasinngormat toqunera eqqartorneqarpoq. Pingasoriarluni ambulancenut sianertoqaraluarpoq. Aatsaat minutsit 26-t qaangiummata takkupput.
Region Hovedstadens Akutberedskabip maanna pisoq misissuiffigaa. Sulisut ambulancemik aggersaanermut tigusisut pisut misissuiffigineqarnerani suliunnaarsinneqarallarnerannik kiguneqarluni.
- Peqqinnissaqarfimmi sulisut eqqarsarlutik ’kalaaliinnaasoq’ pilertornerusumik qisuariarsimanngippata, taava soraarsinneqartariaqarput. Immikkoortitsineruvormi, Jens Mandrup SF-imeersoq oqarpoq.
Danskit kalaallinut ilisimasaqarpianngitsut
Danskit angerlarsimaffeqanngitsunut kalaallinullu angerlarsimaffeqanngitsunut isiginnittariaasiat assingusoq Julie Berthelsen oqarpoq.
- Aqqusinerni kalaallit ersinnerusarput angerlarsimaffeqanngitsunit allanit sanilliullugit. Isikkui allaanerupput aamma ataatsimoorrattarput.
- Danskit kalaallinut uagutsinnut ilisimasaat suli killeqartorujussuuvoq. Kalaallit Nunaanni inooriaaserput pillugu kiisalu suut uagutsinnut pingaartuunersut aamma ilisimaneqarpianngilaq. Angut kalaaleq angerlarsimaffeqanngitsuunera pissutaalluni ambulancet apuuniaasaarnerannut pissuteqarsimanavianngilaq, oqarpoq.