Fælles opgave
Juliane: Meeqqat piitsuut nungutinneqarlik
Meeqqat pisinnaatitaaffii pillugit FN-ip Isumaqatigiissutaa Kalaallit Nunaata suli naammassinngilai. IA kajumissaarivoq meeqqat piitsut nungutinniarlugit politikkikkut isumaqatigiissuteqartoqassasoq
Meeqqat Inuusuttullu Oqaloqatiginnittarfiata MIO-p nalunaarusiaa "Piitsuulluni peroriartortoqassanngilaq" suli oqaasiinnaapput.
Juliane Henningsen, IA, anguniagaq iliuuseqarfigiteqquvaa. Taamaattumik meeqqat piitsut nungutinnissaannik politikkikkut isumaqatigiissuteqartoqassasoq Inatsisartunut kajumissaarutigaa.
– Meeqqat piitsut nungutissavagut. Pingaartumik isorliunerusuni piitsuuneq atugaavoq. Ilisimasat tamatta pisussaaffilerpaatigut. Meeraqarpoq pisariaqartitanik nalinginnaasunik naammattumik pineq ajortunik soorlu nerisassat qaarsillarnartut naammattut, atisat naleqquttut naammaginartumillu najugaqarnissaq. Meeqqat tamakkua meeqqat piitsuunerisa isumaginninnikkut erloqinartumik misigissutsikkullu pitsaanngitsunik kinguneqaataannik atugaqarput. Taamaasiorsinnaanngilagut, Juliane Henningsen oqarpoq, eqqaasitsissutigalugulu meeqqat pisinnaatitaaffii pillugit FN-ip isumaqatigiissutaanik malinninnissamut Kalaallit Nunaat pisussaaffeqartoq.
– Sukkasuumik iliuuseqarnissatsinnut pisussaaffeqarpugut. Isumalioqatigiissitanik pilersitsisa meeqqat piitsuunerisa nuna tamakkerlugu ataatsimut pinaveersaartitsilluni akiuiniarlunilu iliuuseqarnissamut pilersaarummik siunnersuuteqartussamik. Ilanngullugu siunnersuutigaarput Naalakkersuisut peqquneqassasut ilaqutariit meerartallit aningaasakitsut aningaasatigut annertunerusumik ikiorneqarnissaannut ingerlaannavik suliniutinik arlalinnik aallartitsissasut, siunertaralugu piitsuulluni peroriartornerup kinguneqaataanut pitsaanngitsunut meeqqat tamaasa illersorneqarnissaat, Juliane Henningsen oqarpoq.