Siorapaluk-tragedie
Juliane Johannelu ilaqutaasunut katersuiniarniarput
Siorapalummi ilaqutaasunut katersuiniarnissamik qinnuteqaat Politimestereqarfiup sukkasuumik suliaraa. Ilaquttat pinganut Nuummukarput ilaquttatik najoriartorlugit
Siorapalummi pisoq alianartoq tunuliaqutaralugu Johanne Nielsen, Siorapalummi inunngorsimasoq aamma poltiikeri Julia Henningsen, IA, ilaqutariinnut pingasunut, toqunartunissimatortorsimallutik suli Dronning Ingridip Napparsimmavissuani uninngasunut, aningaasanik katersuiniarnissamik qinnuteqarput.
Katersuiniarnissaq Facebook-ikkut tamanut saqqummiunneqarpoq. Marlunngormalli ualikkut arnat taakkua marluk nerisassanik toqunartunissimasunik nerisimallutik Nuummut aallarunneqartut ilaqutaannut katersuiniarnissamut akuersissut Politimestereqarfimmit suli utaqqivaat. Katersuiniarnissamik suliniuteqartuuvoq Johanne Nielsen. Taanna Siorapalummi inunngorsimavoq, ataatsimilli ukioqarluni nunaqarfimmit aallarsimalluni, arlaleriarlunilu Siorapaluk tikeraartarpaa Qaanaami oqalutsitut atorfimminut atatillugu. Johanne Nielsenip maannangaaq oqaatigisinnaanngilaa qaqugu Politimestereqarfimmit akissutisiumaarnerluni, neriuutigaali katersuinissamut akuersissut ullumi marlunngornermi tigujumaarlugu.
Sapaatip akunnerata naanerani Siorapalummi, 65-it missaannik inulimmi, alianartumik pisoqarpoq, tassani angut 71-inik ukiulik toqummat. Aamma pania 46-nik ukiulik toquvoq, allat pingasut peruluttut, marlullu Nuummi Dronning Ingridip Napparsimmavissuanut sapaatip akunnerata naanerani aallarunneqarlutik.
Aamma atuaruk: Nerisassanik toqunartulinnik nerillutik toqusut marluk
Aamma atuaruk: Nerisassat toqunartullit oqartussaasut mianersoqqussutigaat
Aamma atuaruk: Nerisassat toqunartullit - takussutissat makku atorpigit
Aamma atuaruk: Arnaq nerisassanik toqunartulinnik nerilluni toqusoq - sisamat unitsinneqarput