misissuineq

Juliane: Innuttaasut politiinik qanoq naammaginnitsigippat?

Ukiut 20-t qaangiupput Kalaallit Nunaanni innuttaasut politiinik qanoq naammaginnitsiginerannik kingullermik misissuisoqarpat

Kalaallit Nunaanni innuttaasut politiinik qanoq naammaginnitsiginerannik qanittukkut misissuisitsisoqarnissaa qulakkeerniarlugu Naalakkersuisut qanoq iliuuseqarniarpat?
Paragraf 37 naapertorlugu Naalakkersuisunut taamatut apeqquteqarpoq Inuit Ataqatigiit tunuliaqutaralugit Inatsisartunut ilaasortaq Juliane Henningsen. Taamatut apeqquteqarnermini tunngavigaa innuttaasut politiinik qanoq naammagisimaarinnitsiginerannik kingullermik aperineqarsimammata ukiut 20-t matuma siornatigut.
– Danmarkimi innuttaasut politiinik naammaginninnerannik kingullermik misissuisoqarpoq 2008-mi 2010-milu. Tamanna pivoq politeeqarnermik aaqqissuusseqqinnermut atatillugu, taannalu atuutilerpoq januaarip aallaqqaataani 2007-imi. Akerlianik - nalunngisakka malillugit - Kalaallit Nunaanni taamatut misissuisoqarsimanngilaq Eqqartuussiveqarnermut Ataatsimiititaliarsuaq misissuisitsigallarmalli. Tassa nunatsinni innuttaasut politiinik naammagisimaarinninnerannik kingullermik misissuisoqarpoq ukiut 20-t matuma siornatigut, Juliane Henningsen oqarpoq.
Taassuma malugeqquvaa tamatuma kingorna nunatsinni eqqartuussiveqarneq annertuumik aaqqissuuteqqinneqarsimasoq, Eqqartuussiveqarnermut Ataatsimiititaliarsuup inassuteqaatai tunngavigalugit. Taamatuttaarlu nunatsinni politiit aaqqissuussaanerat nutarterneqarsimavoq, tassa politeeqarfiit 16-it nunap immikkoortuini politeeqarfinngortinneqarmata immikkoortortaqarfillit, nunalu tamakkerlugu pigaarfeqarfimmik pilersitsisoqarsimavoq.
– Tamanna tunngavigalugu pissutissaqarluarpoq misissussallugu aaqqissuusseqqinnerit tamakku innuttaasut Kalaallit Nunaanni politiinik naammagisimaarinninnerannik qanoq sunniuteqarsimanersut - aammalu politiit paasisinnaalissammassuk sutigut annertunerusumik iliuuseqartoqartariaqarnersoq, aamma nunatsinni innuttaasunik politiitut sulinerminni, taanna oqarpoq.

Powered by Labrador CMS