Sulisitsisut peqatigiiffiat
Juliane Henningsen Nusukami siulittaasumut tullinngorpoq
Sulisitsisut peqatigiiffiat nutaanik siulersuisortaarpoq ingerlalluarnerulerumalluni
Sulisitsisut peqatigiiffianni mikinerusumi Nusukami siulersuisut siulittaasuata tullertaava inuk malunnaateqarluartuuvoq.
Qanittukkut ataatsimeersuarnermi Inuit Ataqatigiit tunuliaqutaralugit politikeriusimasoq Juliane Henningsen siulittaasup tulliatut toqqarneqarpoq. Taanna oktobarimi Inatsisartunut ilaasortaanerminit tunuarpoq, ingerlatsivimmi namminersortumi Halibut Greenlandimi atorfinikkami - atorfinnilu tamanna nutaaq pissutigalugu Nusukami siulersuisunut ilaasortanngorpoq.
Qinigaaqqippoq
Peqatigiiffiup ukiorpassuarni siulittaasorisimasaa Gert B. Lynge qinigaaqqippoq. Tamatuma saniatigut uku siulersuisunut ilaasortanngorput: Aningaaserisoq Boye Møller, siulersuisunut ilaasortat Noah Mikkelsen, Peter Magnussen aamma Peter Pedersen, sinniissussarlu Josef Mørch.
Peqatigiiffik nukittunerusoq
Nusukap pingaarnertut anguniagaasa ilagaat peqatigiiffiup piginnaanilittut ingerlalluarnerulernissaa.
– Tamanna tunngaviliissaaq kattuffimmik nukittunerusumik sinerissamilu amerlanerusunik ilaasortaqalernissamut, Gerth B. Lynge tusagassiorfinnut nalunaarutikkut erseqqissaavoq.
Ilaasortat amerlanerusut
Taamaattumik peqatigiiffik namminerisaminik allaffissarsiorpoq, nittartagaliorniarluni allaffimmilu pisortamik atorfinitsitsilluni, ilaasortani amerlisarniarlugit, anguniakkat tassaallutik selskabit mikisut akunnattumillu angissusillit. Ilanngullugulu anguniagaavoq arlalinnik brancheudvalgiliornissaq.
Pilersaarusiorneq pitsaanerusoq
Peqatigiiffiup politikkimisut anguniagariniarpai aalisarnermik inuussutissarsiornermi sinaakkutassat pitsaanerunissaat, pisortat kiisalu ingerlatsiviit pisortanit pigineqartut ingerlatsiviit sumiiffimmiittut pilersuisutut atortassagaat, aammalu sanaartornermi pitsaanerusumik pilersaarusiortoqartassasoq.
– Taamaasilluni sinerissami tamarmi ataavartumik suliffissaqartitsisoqassaaq, isumagalugulu sanaartukkat ilaat qanoq annertutigisut sumiiffimmi ingerlatsivinnit ingerlanneqarsinnaanersut, Gerth B. Lynge erseqqissaavoq.