Friday, November 10, 2017 - 09:18

Julia Pars Visit Greenlandimi pisortaaninngorpoq

Julia Pars Visit Greenlandimi pisortaaninngorpoq
Assi.: Visit Greenland
Kulturikkut illorsuarmi Katuami pisortaaneq Visit Greenlandimi pisortaaninngussaaq

- Kalaallit Nunaanni takornariaqarneq annertusiartorpoq, tamannalu isumaqarpoq inuussutissarsiummi unammilligassat
nutaat pissanganartut. Nuannaarutigaarpullu Julia Pars Visit Greenlandimi ukiuni aggersuni siuttuusinnaaneranik
neqeroorfigisinnaagatsigu.

Visit Greenland tusagassiuutinut nalunaarummi allappoq.

Julia Pars ukiuni kingullerni qulini kulturikkut illorsuarmi, Katuami, pisortaanertut atorfeqarpoq.

- Julia Kalaallit Nunaat nalunngilluarpaa. Ilulissani inunngorpoq, ukiulli kingulliit arlalissuit Nuummi najugaqarsimalluni.
Ukiut kingulliit qulit takornariaqarnikkut toqqaannartumik akuunngikkaluarluni Juliap inuussutissarsiutip ineriartornera
malinnaaffigisimavaa. Minnerunngitsumillu nunatta avammut ilisarnaatigilersimasaa “Pioneering Nation”, pisortaanertut
siuliata Anders Stenbakkenip siuttuuffigisimasaata, ineriartortinneqarnera malinnaaffigisimallugu, Visit Greenland allappoq.

Julia Pars isumaqarpoq nunatta ilisarnaatigiligaa ukiuni aggersuni suliffeqarfiup suleriaqqinnissaanut
toqqammavigissaarutigissagaa. Siunissamilu aamma nunap immikkoortui sumiiffinnilu takornarialerisut peqatigalugit
takornariaqarnerup inerisaqqinnissaa aallunneqassalluni.

- Takornarialerinerup imminut napatissinnaalernissaa anguniarlugu inuussutissarsiut nunatsinnut tamanut ukiorlu kaajallallugu inuussutissarsiutaalernissaata siammarneqarnissaa misilittariaqarnera pingaartuusorivaa, taamaalilluni Kalaallit Nunaanni takornarialerineq taamaallaat aasakkut qaammatit pingasuinnaratik sivitsornissaat, taanna tusagassiuutinut nalunaarummi oqarpoq.

Kulturikkut illorsuup Katuap paasissutissiaraa, Julia Pars ukiup tulliani januarip 31-nni naggammik sulissasoq. Kulturikkullu illorsuarmi teknikkimut pisortaq, Eigil Petersen, februarip ulluisa aallaqqaataaniit pisortaanermik pissarsinissap tugaanut pisortanaanerungallassaaq.

Seneste nyheder / Nutaarsiassat kingulliit