Tamassa

Hans Jukku takoqqissinnaalissavat

Ilisarisimaneqarluartoq Hans Jukku Noahsen 'Tamassa'-mi aallakaatitsivimmeeqqittalissaaq

Februaarip aallaqqaataaniit Hans Jukku Noahsen -ip aallakaatittagaani 'Tamassa'-mi aallakaatitsivimmeeqqittalissaaq. Uani aallakaatitsivimmeeqatigisartagassaa ArnánguaK Lyberth assileqatigaa KNR

- Taamatut tusagaqarneq nuanningaarmat allaat ima oqarusunnarsivoq 'Ladies and Gentlemen' taavalu saagut illuartillugit.

KNR-ip aallakaatittagaani 'Tamassa'-mi aaqqissuisoq Heidi Møller qiimalluni oqarpoq, tassami Hans Jukku Noahsen ukiup affaa sinnerlugu 'Tamassa'-miinnukuunani aallakaatitsivimmut uteqqilermat.

Heidi Møller-ip qularutiginngilaa Hans Jukku Noahsen-ip aallakaatitassiamut uteqqilernera tapertaalluarumaartoq. Ukiummi kingulliup ingerlanerani unammilligassat amerlasimapput soorlu ilaatigut suliffiup oqoqarnera pissutaalluni aallakaatitsivik nuuttariaqalersimanera unammillernartut ilagisimammassuk.

'Tamassa' februarip aallaqqaataani aallakaatinneqaqqittalerpat Hans Jukku Noahsen peqataasaleqqissaaq, ilaatigullu aamma ilinniarnermi tunngatillugu suliffimmik misiliisoq suleqataalissalluni. Arnànguak Lyberth aallakaatitsivimmiittartutut ingerlaannassaaq junillu tungaanut Hans Jukku aallakaatitsivimmeeqatigissallugu.

Aallakaatitassioriaasitta nukittorsaqqinnissaa qilanaaraara aammalumi aallakaatitassiami imarisaasut annertusaaffiginissaat qilanaaralugu. Aammalu isiginnaartartut sinnerlugit maani 'Tamassa'-mi qilanaarpugut, 'Tamassa'-mi aaqqissuisoq nuannaarluni oqarpoq.

Powered by Labrador CMS