aliikkusuineq
Hans Jukku ilulissialerpoq
Illartoqassanguatsiaqaaq quiasaarisartoq Hans Jukku Noahsen Ilulissani kulturip illorsuani Sermermiuni aliikkusersuilerpat
Hans Jukku Noahsen tallimanngornermi unnukkut aliikkusersueqqittussanngorpoq. Quianartut nutaat sauummiunneqarumaarput aammalu tupaallaatissamik takkuttoqassagunarluni.
Sermermiuniit nalunaarput billitsinik tuniniaaneq ingerlalluartoq issiaviusinnaasut 193-usut affaat sinnerlugit tunineqareersimasut aliikkusersuinissamut qulingiluanut pisussamut.
- Naatsorsuutigaara nalunaaquttap akunneri marluk aliikkusersuinermi atussallugit. Siornatigut aliikkusersuisarninnit allaassutigissavaa maanna kisimiittussaagama, Hans Jukku Noahsen, siornatigut ikinngussuani Nukannguaq Geisler peqatigalugu aliikkusersuisareersoq, Sermitsiaq.AG-mut oqarpoq.
Taakku aamma Sermermiuni aliikkusersuereerput ilassilluarneqartumik.
- Neriuppunga inuit qiimmassimaarlutik unnugu takkukkumaartut. kIngullermik taavaniikkatta inuit nuannisaarusussuseqarlutik takkussuukkamik nuanneqigami, Hans Jukku Noahsen oqarpoq.