Piggappaat
Hans Jukku aallakaatitseqqinnginnermini: Aallakaatitsinerit ingerlalersussat nuannerunarluinnarput
Aallakaatitaq nuannarineqarluartoq 'Piggappaat' aallakaatinneqaqqittalissaaq
Aallakaatitassiaq aliikkutarineqarluartartoq 'Piggappaat' aallarteqqilerpoq. Pulaartut amerlinerussapput, pulaarfiup issikkua pitsanngorsarneqarsimalluni aammalu suli qiimanarnerussalluni.
KNR-imit taamatut nalunaartoqarpoq.
- Aallakaatitsinerup aallartinnissaata tungaanut kikkut pulaartuussanersut oqaatiginaveersaartarparput, KNR-ip tv-kut aallakaatitsinernut tungatillugu pilersaarusiornermut pisortarisaa Jan Berg oqarpoq. Taassumallu oqaasii naapertolugit pulaartussat pakatisitsinavianngillat.
KNR TV-kkut aallakaatinneqartartup uuma massakkut aallakaatinneqartussat nanginnerai. Piggappaatimi aqutsisoq Hans Jukku Noahsen aamma ingerlaqqilernissaminut qilanaarpoq.
Aallakaatitassiaq pingasunngornikkut unnukkut nalunaaqutaq qulinut takuneqarsinnaasassaaq. Aammattaaq kingusinnerusukkut KNR.gl-imi takuneqarsinnaassalluni.