Juaaka ukiuni 45-nngortorsiornerminut atatillugu Nuummi tusarnaartitsissaaq

Juaaka Lyberth nipilersornikkut assigiinngitsunik ukiuni kingullerni 45-ni nipilersoqataasarpoq. Tamanna atatillugu Nuummi Katuami tusarnaartitsissaaq.

Florent Vollant aamma Kashtin tusarnaartitsereerpata Juaaka Band tallimanngornermi oktobarip 31-ani tusarnaartitsissapput.

Nuummi realskolemi isiginnaagassiap Mik-Mak-ip 1969-mi takutinneqaqqaarnerani Juaaka Lyberth nammineq erinniaminik talliaminillu atueqqaarpoq. Taamanernilli ukiut tamarluinnangajaasa Juaaka kipissanani nipilersortarsimavoq, taamaattumillu ukioq manna nipilersortartutut ukiut 45-ngortorsiorluni.

Meeqqanut erinarsuutit 'Sinigit Meerannguaq' (filmimi Gravity-mi atorneqartoq) aamma 'Anaana' (filmimi Inuk-mi atorneqartoq) Juaakap nunatsinni tusaamasaassutigeqqaalerpai, aammali erinarsuutit politikkimut sammisut 'Kalaaleqatikka' aamma 'Inuiaat Kalaallit' Juaakap ilisarnaatigilluarpai.

Erinnalli tammajuitsut nuannarineqaqisullu asanninnilersaarutaapput 'Asasannut' aamma 'Lis Mari'. Erinnat tamakku allarpassuillu tusarnaarneqarsinnaassapput Juaaka Band ukiunik 45-ngortorsiorluni Katuami tusarnaartitsilerpat, tallimanngornermi oktoberip 31-ani.

Juaaka Bandip uku inuttarai: Juaaka - erinarsortoq, guitarertoq; Pilu Noahsen - erinarsortoq, Leif S. Immanuelsen - keyboard tulleertoq; Kristians Herlufsen - bas; Juuna Zethsen - el-guitar; Kristian Otto Therkildsen - tulleertoq.