Joorut apeqqarissoq Jensimik ateqassanerpa?
Ullormi ataatsimi apeqqutit 19-t. Inatsisartunut ilaasortamit ataatsimit. Naalakkersuisoqarfiit pingasut maanna ulapinnissamut piariissapput.
Inatsisartunut ilaasortaq, Jens Napãtôk, Partii Naleraq, parteeqatimi Anrthon Frederiksenip paragraf 37-imut apeqqutinut tunngatillugu Inatsisartunut ilaasortani apeqquteqarnerpaatut inissisimaffia anguniarpasippaa. Isumaginninnermut Inatsisinillu Atuutsitsinermut maanna Naalakkersuisuusup 2016-imi apeqquterpassuaqarnermini taanna apeqquteqarnerpaasutut inissippoq.
Apeqquterpassuit
Jens Napãtôk apeqquterpassuarnik 19-inik nassiussivoq. Sammisat puisip amiinik tunisinernut, timelærinut aamma Joint Committeemut tunngassuteqarput.
Naatsorsueqqissaartarfiup qanittukkut akissut ilisimatitsissutigereeraluaraa – Sermitsiaq.AG-milu ulloq taanna issuarneqaraluartoq – Inatsisartunut ilaasortaq ima apeqquteqarpoq:
- Kalaallit Nunaanni puisit amii qanoq amerlatigisut ukioq 2017-imi tunineqarsimappat?
Akissutaa tassaavoq 16.281, Naatsorsueqqissaartarfik sapaatip-akunneri marluunngitsut matuma siorna taama ilisimatitsivoq.
Aalisarnermut Piniarnermut Naalakkersuisoqarfimmi atorfilittat taamaattumik apeqqut ataaseq akeriaannaammat oqiliallallutik VM-ip ingerlallualeruttornerani anersaariaannaapput.
Takornarissat kikkut kisittarpaat?
Uku akineqarnissaannut tunngatillugu allatut pissagunarput:
- Joint Committee Kalaallit Nunaannut takornariaqarnikkut qanoq tunniussaqarpa, takornarissat amerliarsimappat?
Apequut tassunga kommitemut tunngasumut apeqqutit arfineq-marluk ilagiinnarpaat, ima tunngavilersuutitaqarpoq:
- 2004-imi Igaliko-isumaqatigiissummik taallugu Kalaallit Nunaat, USA aamma Danmark 1951-imi isumaqatigiissut nutarsarlugu isumaqatigiissummik atsiugaqarput, atsiungaqarnerminni joint committee aqqutigalugu suliniutit assigiinngitsut isumaqatigiissutigineqarput. Isumaqatigiissutip kinguneri aammalu iluaqutai nalilersorneqarsimanersut imaluunniit Kalaallit Nunatsinnut sutigut iluaqutigineqarsimanersut paaserusunnarpoq.
Atorfilittat tassani Naatsorsueqqissaartarfimmut saaffiginnissinnaanngillat.
Ullut suliffiusut qulit
Jens Napãtôk apeqqutimi ullut suliffiusut qulit qaangiutinnginneranni akineqarnissaat kissaatigaat, tamanna inatsisitigut aalajangersagaavoq.