Arctic Winter Games
Jonas Strømsted kuultinnareerluni: 'Nuannaaqaanga'
Snowboarderluni juniorit sangusaarneranni Jonas Strømsted Nuummeersoq kuultinnappoq. Kalaallit Nunaanni snowboardertalerniartunut siunnersuutissaqarpoq
17-inik ukiulit Jonas Strømsted marlunngornermi snowboardimi sangusaarnermi kuultinnappoq, minutsi ataaseq sekundilu ataaseq atorlugit apuuppoq, ajugaasup tullianit Yukonimeersumit sekundinik pingasunik sukkanerulluni.
Strømstedip ajugaanerata kingorna Sermitsiaq.AG-p apersorpaa.
Atuaruk: AWG-medaaliat arfinillit najukkaminni snowboardertunit pissarsiarineqarput
Snowboardertartunut ulloq siullermi sangusaarnermi kuultinnapputit. Maanna qanoq ippit?
- Nuannaaqaanga. Sisunik siulleq naammagisimaarpara, sisunerup aappaani qeqqanut pigama uppippunga, kisianni sukkasuumik massipput sukkanerpaallungalu apuullunga.
Majuartaamukaritsi!
17-inik ukiulit Jonas Strømsted aqqaneq-marlunnik ukioqarluni snowboardertalerpoq.
2013-imi Jonas Strømsted siullermeerluni GM-imut peqataavoq, tassani arlalinnik medaaliannappoq.
- Allat snowboardernermik nuannarisaqartut kaammattuinnarsinnaavakka, periarfissaqaraangata majuartaammukartaqqullugit, tassami maani nuannisartarpugut. Tassanngaanniik ingerlaqqissagaanni sungiusartoqartariaqarpoq, assoroorluni sungiusarluni, Nuummi snowboardertartoq Aasianni inunngortoq oqarpoq.
Jonas Strømsted Railsimi aamma Slope Stylemi uani AWG-imi peqataassaaq.
Kingusissukkut sungiusalertoq
AWG sioqqullugu sungiusarnerit qanoq ippa?
- Oqitsuinnaavallaanngilaq, tassami iluameertumik Railsimut sungiusarfissaqarsimanngilagut. Apummik amigaateqarnikuunerput pissutigalugu, atortut aatsaat ikkunneqaqqammerput. Kisianni oqaatigerusuppara, majuartaatilerisut sulilluarsimasut apummik sumit tamanit katersillutik. Majuartaatilerisut maani suliaat qujamasuutigaagut.
Sapaatip-akunnerisa pingasut matuma kalaallit snowboardertartuni kuultinnattortaat napparsimavoq, ullumikkullu tamanna aamma malunnaateqarpoq, Sermitsiaq.AG oqaloqatigigamiuk iggiarluppoq.
Qitikkut ajoquserneq iluaalliortitsisoq
Erniinnaq Rail Jam unammissutaassaaq, tassanilu Jonas Strømsted peqataassaaq. Tassanili unammissummi medaaliannannissaminut naatsorsuutai annertuallaanngillat.
- Containerimit pissinneq sungiusarninni qitinnik tullunga ajoquseqqammerpunga. Ajoqusernera sianiummiittoq pissutigalugu, aatsaat piffissami sivisuumi uninngareerlunga sisoraqqippunga, Jonas Strømsted oqarpoq.
AWG pillugu allaaserisat kingulliit:
Kalaallit kuultimik medaaliannattaavat siulleq pissarsiarineqarpoq
Arctic Winter Gamesimi marlunngornermi pisussat
AWG-medaaliat arfinillit najukkaminni snowboardertunit pissarsiarineqarput