assit takukkit
John Thorsen GBU-mi siulittaasutut qinigaaqqippoq
Kalaallit Nunaanni Arsaattartut Kattuffiata GBU-p sinniisaat ataatsimiipput Nuummi sapaatiummat. Siulittaasuusimasut diplominnatsinneqarput kiisalu nersuisoqarluni
Kalaallit Nunaanni Arsaattartut Kattuffiata siulittaasuat John Thorsen siulittaasutut sapaasiummat qinerneqaqqippoq.
Allanik siulittaasutut qinigassanngortittoqanngilaq. Kattuffiup ilaasortaasa ataatsimiinneranni tamanna pivoq.
GBU tusagassiutinut nalunaaruteqarpoq.
Siulersuisunut ilaasortassanik aamma qinersisoqarpoq. Tassani qulit qinigassanngortipput, ataanilu qinerneqarsimasut arfinillit atuarneqarsinnaapput:
- Gerth Fleischer
- Jens Mølgaard
- Oluf Olrik
- Nukannguaq Zeeb
- Allan Ole Eriksen
- Kent Kielsen
FIFA/DBU sungiusaanermik sisamanngornermi pikkorissartitsivoq, kiisalu seminareqartinneqarlutik arfininngormat.
GBU-mi siulittaasuusimasunik naggataarnersiortoqarnerani diplominik agguaasoqarpoq. Nuummiittut siulittaasuusimasut diplominnatsinneqarput:
- Noah Steenholdt, (den første grønlandske formand)
- Hans Pavia Egede
- Nathan Biilmann
- Piitaaraq Kleist (Pala)
- Lars Lundblad
Nersuinerit
Suliamik ingerlatsilluartunut nersuisoqarpoq. Lena Ravn Davidsen ,Nagdlunguak 1948, Ilulissaneersoq meeqqanik inuusuttunillu sullissilluarneranut kiisalu peqqinnerulernissaq anguniarneranut suliniuteqartarneranut nersorneqarpoq.
Aamma Benigne Kristensen Karlsen UB-83-imeersoq Upernavimmi aamma nersorneqarpoq, ukiuni amerlasuuni isikkamik arsaannermi suliaqarnini nersorneqaatigalugu.