pilluarit
John Thorsen GBU-mi siulittaasunngorpoq
Kalaallit Nunaanni arsaattartut kattuffiat GBU ukiortaami siulittaasortaarpoq siulersuisunilu nutaamik ilaasortaqalerluni
Kalaallit Nunaanni arsaattartut Kattuffiat 1. januar 2014 aallarnerfigalugu nutaamik siulittaasortaarpoq nutaamillu siulersuisuni ilaasortartaarluni.
Ukiorpassuarni siulittaasuusimasoq, Lars Lundblad, 2013-ip naaneraniit tunuarniarluni aalajangersimavoq peqqinnissani eqqarsaatigalugu. Taamaalilluni siulittaasumut tulliusimasoq John Thorsen qinigaaffiup sinnerani siulittaasuusussanngorpoq. Siulersuisunut iserportaaq Jens Mølgaard, Qeqertarsuarmiit. Jens Mølgaard siusinnerusukkut Arsaattartut Kattuffianni siulersuisuneereernikuuvoq.
Taamaalillutik siulersuisut imatut inuttaqalerput: John Thorsen, Nuuk, Gerth Fleischer, Uummannaq, Oluf Olrik, Qeqertarsuaq, Lars Erik Gabrielsen, Ilulissat, Leif Frederiksen, Nanortalik, Børge Høy, Tasiilaq og Jens Mølgaard, Qeqertarsuaq.
Sulittaasup avataatigut siulersuit sapaatip akunnerata tulliani inissititissapput.
Tassunga atatillugu siulersuisut ukiorpassuarni Arsaattartut Kattuffianni siulittaasuusimasoq Lars Lundblad - Laasi qutsavigiumavaat ukiorpassuarni annertuumik arsaannerup tungaatigut suliaqarsimaneranut. Laasip pingaarnertut uummateqarfigisimavai meeqqat susassaqartinnissaat inerisarnissaallu, ilaatigut fodboldskole ullutsinni aasat tamaasa pisussatut sineriassuatsinni illoqarfinni nunaqarfinnilu naatsorsuutigineqartualersimasut, pilersinneratigut.
Taassuma avataatigut Laasip pingaartissimavaa DBU-mik aammalu DBU aqqutigalugu FIFA-mik suleqarteqarnissaq. DBU-mik suleqateqarneq sungiusaasunik dommerinillu aaqqissuussaasumik ingerlanneqarnera, aammalu pisussatut tullertut arsaannerup iluani aqutsinermut tunngasunik pikkorissaanissanut.
Taamaalilluni Laasi annertuumik sunniuteqarsimavoq, naak ullutsinnut naleqquttunik arsaaffeqarunaaraluarluta, arsaannerup siuariartuinnarnerani massakkumut angusatsinni.
Siulersuisut kingumut Laasi qutsavigiumavaat suliarisimasaanut, peqqissulluarnissaanillu aammalu siunissami ajunngitsumik inuunissaanik kissaallugu.