Johan Lund Olsen: Suleqatigiissutiginiagaq tigussaanngitsoq

Inuit Ataqatigiit Folketingimi ilaasortaatitaat, Johan Lund Olsen, Nunat avannarliit siunnersuisooqatigiivisa Stockholmimi ataatsimiinneranni Inuit Ataqatigiit Venstre Socialistiske Gruppelu sinnerlugit pingasunngornermi Stockholmimi oqalugiarpoq.

Nunatsinnit qinikkanit kisiartaalluni najuuppoq oqalugiarnerminilu imminut sinnerluni Venstre Socialistiske Gruppelu aamma sinnerlugu ministerrådip Issittoq pillugu suleqatigiinnissamut siunnersuutaa pillugu oqalugiarluni.

- Issittup sammineqarnera nuannaraa, kisianni nunat avannaamioqatigiit sinnerlugit Issittumi suleqatigiinnissamut siunnersuut isumarput malillugu tigussaanngilaq siammasippallaarlunilu, Johan Lund Olsen oqalugiarami taama oqarpoq.

Inuit Ataqatigiimmi Venstre Socialistiske Gruppelu isumaqarput uumassusillit pisuussutit pillugit paaseqatigiinerusoqarsimasinnaangaluartoq:

- Pisuussutit uumassusillit atorneqartarnerat pillugu paaseqatigiittoqarnerusinnaasimagaluarpoq, aamma Issittumi sakkutooqarnikkut sillimaniarluni annertusaaneq qissimigaarneqarnerusinnaangaluarpoq, Inuit Ataqatigiinnersoq, Johan Lund Olsen, ilaatigut taama oqalugiarami oqarpoq.

Puisinik nioqqutissiat mattunneqarnerat Issittormiut ajornartorsiutigaat
Johan Lund Olsen, Folketingip Issittumi aallartitaatut, Arktiske Parlamentariker Komitemi, Sara Olsvig taarserlugu inisseqqammersup, issittoq pillugu tassani sammisaqarneq tapersorniarpaa.

Tassanilu suleqatigiinnermi Inuit Ataqatigiit aamma Venstre Socialistiske Gruppep suliassaq tigussaasoq sammitikkusutaat tassaavoq puisinik nioqqutissianik mattussineq.

- Ataatsimoorluta annertunerusumik immitsinnut paaseqatigiinneruliinnarata, kisianni aamma nunat avannarliit akornanni puisinik nioqqutissiat pillugit ilisimasaqarnerulertariaqarpugut. Puisinik nioqqutissianik mattussineq kisimi Kalaallit Nunaannut Canadamulluunniit ajornartorsiutaanngilaq, kisianni Issittumi tamarmi ajornartorsiutaavoq nunat avannarliit suleqatigiinnerannut aamma attuumassuteqartoq, Johan Lund Olsen ilaatigut taama oqarpoq.