oqaaseqarumanngitsoq
Johan Lund Olsen: Statsministerip apeqqutit akiumanngilai
Inatsisartunit apeqqutigineqartut statsministerip Helle Thorning-Schmidtip akiumanngimmagit IA-mi folketingimi ilaasortap Johan Lund Olsenip pakatsissutigaa
Statsministeri Helle Thorning-Schmidt, Socialdemokraterne, Folketingimi Europa Kommissionip puisip amia pillugu allannguutissatut siunnersuutaata eqqartorneqarmat kiisalu Kalaallit Nunaata Danmarkip USA-llu illersornissaq pillugu isumaqatiginninniutigineqaqqinnissaa pillugu oqallisigineqarmat erseqqissumik apeqquteqaatinut akissuteqanngilaq. Inatsisartuniimmi marsip 19-ani piumasarineqaraluarpoq apeqqutigineqartut akineqarnissaat, Johan Lund Olsen, Inuit Ataqatigiit naliliivoq.
Nunat avannarlerneersut statsministerimut apeqquteqaateqarnissaminnut periarfissinneqarmata Johan Lund Olsen iliuuseqaraluarpoq.
Akissutigineqartunulli Johan Lund Olsen pakatsivoq.
Nunanut allanut ministerimut innersuunneqarpoq
- Apeqqutigineqartut statsministerimit akineqanngillat, apeqqutillu nunanut allanut ministerimut innersuunneqarlutik, Johan Lund Olsen Sermitsiaq.AG-mut oqarpoq.
- Tamanna akuersaarnanngilluinnarpoq. Statsministeri Naalagaaffeqatigiinnermut Statsministeriuvoq taamaattumik Pituffik pillugu apeqqutigineqartut akisussaagaluarpai. Ilaasortat aamma allat Pituffimmut tunngasunik apeqquteqarniartaraluarput. Apeqquteqaatigaara Pituffimmi illersornissamik isumaqatigiissutip USA-mik isumaqatiginninniutigineqaqqinnera akuersaarneraa, Johan Lund Olsen oqarpoq.
- Kalaallit Nunaannut ajoqqutaasussamik aamma suliaqartoqarpoq, tassa puisip amianik eqqussisinnaaneq Europa Komissionimit aamma Europa Parlamentimit suliarineqarpoq. Suliap kinguartinneqarnissaa statsministerimit sulissutigineqarsinnaagaluarpoq, IA tunuliaqutaralugu politikkeri oqarpoq.
Akissuteqarnissani neriorsuutigigaluaraa
Naalagaaffeqatigiit aamma EU suleqatigiilluaraluartut Helle Thorning-Schmidtip oqaatigigaluarpaa.
- Europa-Kommissionip suleqatiginissaanut atsioqateqarpunga Naalakkersuisut siulittaasuat peqatigalugu sapaatip akunnera kingulleq. Atsioqatigiissutigineqartoq pingaaruteqarpoq. Suleqatigiinnerulernissaq atsioqatigiissutigineqarpoq, tassani aatsitassarsiornikkut, nukissatigut, ilisimatusarnikkut takornarialerinikkullu suleqatigiittoqarnerulissaaq. Naalagaaffeqatgiiinnermut tunngasut apeqqutit akissuteqarfiginissaat qilanaaraara, Helle Thorning-Schmidt oqarpoq.
Akissutigineqartulli Johan Lund Olsenip pakatsissutigai. Puisip amianut tunngasoq aamma suliaq ilungersunartoq pillugu Statsministeri aperineqarami akiumanngilaq.
Siumumit Doris Jakobsen Folketingimi marlunngornermi ataatsimiinnermi najuutinngilaq.