Puisip amia
Johan Lund Olsen Bruxellesimi: Nunarput Danmarkilu sukateriniarnermut isumakulupput
Kalaallit Nunaat pillugu Folketingimi ataatsimiisitaliami siulittaasoq Europa-Parlamentimi ilaasortanik ataatsimeeqateqarniarluni pingasunngornermi Bruxellesimiippoq
Inuit Ataqatigiit Folketingimi ilaasortaatitaat, Johan Lund Olsen, pingasunngornermi Bruxellesimiippoq Europa-Parlamentimi ilaasortat arlallit EU-Parlamentip puisit amiinik eqqusseqqusinnginnerminut malittarisassanik allannguiniarnerani oqaaseqartartunik kiisalu Europa-Kommissionimik ataatsimeeqateqarniarluni.
Folketingimi Inatsisartunilu ataatsimiisitaliat arlallit sinnerlugit Johan Lund Olsen allakkanik nassarpoq Europa-Parlamentimi ilaasortamut rumaniamiumut, Cristian-Silviu Bușoimut tunniussassaminik. Taanna Europa-Parlamentip ataatsimiisitaliaani puisit amiinik eqqusseqqusinnginnerminut malittarisassanik allannguiniarnermi suliaqartumut oqaaseqartartuuvoq.
Kalaallit Nunaat pillugu Folketingimi ataatsimiisitaliami siulittaasup Europa-Parlamentimit kalaallit piniartukkormiut maanna eqqornerlunneqareersimasut immikkut pineqarnissaat kissaatigalugu oqariartuutigivaa.
- Annguppusuppara sakkortuumik ernummatigigatsigu siunnersuut puisinniartarnermut piniartukkormiunullu ajorluinnartumik kinguneqarsinnaasoq, Johan Lund Olsen Cristian-Silviu Bușoimut allappoq.
Atuaruk: Siunnersuisooqatigiit EU-p sukateriniarnera akuerinngilaa
Atuaruk: Puisip amia: Kalaallit suleqatigiinnissaat Doris Jakobsenimit ujartorneqarpoq
Kingunissai misissoqquneqarput
Busoimut allakkani Kalaallit Nunaata aamma Danmarkip siunnersuutigaa Europa-Kommissionip puisit amiinik eqqusseqqusiunnaarnerup Kalaallit Nunaanni innuttaanut kingunerisaanik misissuisariaqarnera, kiisalu puisit amiinik eqqusseqqusinnginnermini naggueqatigiit Inuit ilaatinneqannnginnerinut paasisitsiniaasoqarnissaanut aamma kaammattuuteqarlutik.
Europa-Kommissionip puisit pillugit aalajangersagassaata ukioq manna oktobarip 18-at tikitsinnagu piareersimasussaavoq.
Allakkat EU-Parlamentimukartut aamma rumaniamiumut oqaaseqartartumut ingerlasut Kalaallit Nunaat pillugu Folketingimi ataatsimiisitaliamit, europa pillugu ataatsimiisitaliamit, nunanut allanut tunngasunut ataatsimiisitaliamit kiisalu Inatsisartut nunanut allanut sillimaniarnermullu ataatsimiisitaliaanit atsiorneqarput.
Atuaruk: Puisip amianik EU-p inatsisinik sukateriniarnera kalaallinit ernumagineqarpoq