Jess Svane parteeqatiminit taperserneqarpoq

Nunatsinni kommuunit avannarlersaata isumagininnermut ataatsimiisitaliaata siulittaasua, Siumumeersoq Jess Svane, ineqarnermut akiitsut qaffakkaluttuinnartut pillugit isumasioqatigiittoqarnissaanut marlunngornermi piumasaqarpoq.

- Ilumoorsinnaanngilaq pisortat attartortitsisutut aamma attartortunut tapiissuteqartassappata, taamami isumaqarpoq.

Jess Svanemi, ineqarnermut akit, akiitsut amerligaluttuinnartut akiorniarlugit, malunnartumik appartinneqarnissaanut siorna siunnersuuteqartoq, isumaqarpoq pissusissamisuunngitsoq pisortat, tassa Namminersorlutik Oqartussat kommuunillu inissianik attartortitsisuunermik saniatigut ineqarnermut tapiissutinik agguaasariartarneri, attartortorpassuit ineqarnermut akiliutit nammineerlutik nammassinnaasanngimmatigit.

Atuaruk: Jess Svane ineqarnermut akiitsut pillugit isumasioqatigiittoqarnissaanut piumasaqarpoq

Pisortat aningaasaliissutaat kaaviaarusaaginnartut
Jess Svanellu nuna tamakkerlugu kommuninit Inatsisartunilu ataatsimiisitalianit attuumassuteqartunit peqataaffigineqartumik isumasioqatigiittoqarnissaanut piumasaqarnera, avannaani kommuunimi ilaasortaaqataanit, Siumumeersumit Palle Jerimiassenimit taperserneqarpoq.

- Ineqarnermut akit, kiassarnermullu akit pinngitsooratik naliliiffigineqarnissaat saneqqunneqarsinnaanngilaq, aningaasat karsimiit ataatsimiit aallaavillit allatut taajuseqattaalaaginnarlugit kaaviiaartinneqarput allaffissornerujussuarmik pilersitsillutik, Palle Jerimiassen parteeqatimi Jess Svanep ineqarneq pillugu nuna tamakkerlugu isumasioqatigiittoqarnissaanut kaammattuuteqarluni taama allappoq.

- Eqaannerusumik aaqqiinissaq siunertaralugu oqaloqatigiinnerit ingerlanneqarniarlik, siunissarlu ungasinnerusoq aamma isigalugu akilersueriaatsip qanoq aaqqinneqarsinnaanera pinngitsoorani eqqartorneqartariaqarluni, Jerimiassen isummersorpoq.

Massakkut iliuuseqartoqarnissaa piumasaraa
Palle Jeremiassen ilanngullugu allappoq maanna anisitaasussat pillugit aamma iliuuseqarnissaq tuaviuunneqartariaqarpoq, ilaqutariit toqqissisimasumik ingerlariaqqinnissaat siunertaralugu.

Nuna tamakkerlugu Inimi attartortuni 398-ini akiitsoqarnertik pissutigalugu anisinneqarnissaminnut ulorianartorsiortuni 122-it Qaasuitsup Kommuniani najugaqarput. Taakkua 122-it Qaasuitsup Kommuniata illoqarfiini arfineq-pingasuni tamarmik siammarsimapput.

Nunap immikkoortuini ineqarnermut akiitsut imaapput

11 millioner koruunit ineqarnermut tapiissutitut
Qaasuitsup Kommunianit kisitsisit tunniunneqartut naapertorlugit kommuuni 2014-imi ineqarnermut katillugit 10.9 millioner koruuninik tapiissuteqarpoq. Ineqarnermut tapiissutit qinnuteqartup taassumalu najugaqaataasa isertitaat aallaavigalugit annertussusilerneqartarput.

Tamatuma saniatigut nunatsinni kommuunit avannarlersaat 2014-imi pisortanik ikiorsiissutinik 42,4 millioner koruuninik tunniussaqarpoq. Kommuunimiillu nassuiaatigineqartut naapertorlugit pisortanit ikiorsiissutit akiligassanut aalajangersimasunut, soorlu ineqarnermut innaallagissamullu, kiisalu inuuniutissanut tunniunneqartarput.

Ineqarnermut allaaserisat allat uani atuakkit