Kuannersuit
Jess G. Berthelsenip kiinamiut nuannaarutigai
Sulinermik inuussutissarsiortut kattuffianni siulittaasup isornartorsiuisut avoqqaarpai
Kuannersuarni aatsitassanik qaqutigoortunik aamma uranimik qalluiffimmik SIK tapersersuisuusimasoq isertuunneqanngilaq. Tamanna tunuliaqutigalugu Jess G. Berthelsenip kiinamiut Greenland Minerals and Energymut (GME) aningaasaliinera nutaarsiassatsialaanerarpaa.
Suliffissaaleqineq suli annertuallaartoq, aamma aalisarnerinnaanngitsumik inuussutissarsiutinik suliffinnik allanik pilersitsisoqartariaqartoq, taanna isumaqarpoq.
- Taamaattumik SIK-p nuannaarutigaa tusarlugu Greenland Minerals and Energymut nunani allaniik aningaasaliisoqarusuttoq, taamaasillunilu neriunaateqalerluni Kuannersuit suliffeqarfittut pingaarutilittut ammarsinnaanissaa, Jess G. Berthelsen oqarpoq.
Atuaruk: Kiinamiut GME-mik tigusinissaat akuersissummik pisariaqartitsivoq
'Amiilaartitsinermik' isornartorsiuineq
Tamatuma saniatigut kiinamiut suliffeqarfiutaannik aamma GME-mi suliniuteqarnerannik qularinnittunut sakkortuumik isornartorsiuvoq. Ilaatigut qallunaat tungaannit mamiatsattoqarsimasoq, taanna isumaqarpoq, oqarlutik 'Kineserinngooq nunarput tiguassavaat'.
- Taamaattumik nunat allat, aamma Danmark ilanngullugu, nunatsinni kiinamiut aningaasaliinissaat akerlereqigunikku, asuli ersisaariinnaratik taava namminneq aningaasaliiniarlik, Jess G. Berthelsen oqarpoq.