Jerimiassen: Piniagassanik nungusaanngilagut

- Kalaallit ileqqorinngilaat piniagassanik nungusaasarlutik, aamma appanik. Naalakkersuisut politikkerinngilaat piniagassanik nungusaassallutik, aamma piniagassat ikiliartornerinut akuersaartuunngillat.

Aalisarnermut, Piniarnermut Nunalerinermullu Naalakkersuisunut ilaasortaq, Nikolaj Jeremiassen allalluni taamatut qisuariarpoq.

Demokraatini Inatsisartunut ilaasortaq, Michael Rosing allakkanik tigusisuuvoq. AG-mi atuaasartut isummersortarfianni taassuma Naalakkersuisut appat pillugit politikkiat apeqquserpaa. Michael Rosingip tamanna politikki appat nunguinnissaannut inerneqartussatut siooqqatigaa.

Naapeqatigiinneq
Michael Rosingip AG-mi atuaasartut isummersortarfianni ilaatigut allappoq 'Naammaleqaaq. Naalakkersuisut ilisimatuut innersuussutaat tusaanngitsuusaaginnarsinnaanngilaat silatusaarnerlu. Eqqortuusinnaanngilaq qaarsillaffeerussimasugut kinguaariillu tullii appatornissaannut mattullugit.'

Pinngortitaleriffiup ilaatigut innersuussutiginikuuaa appat ukiuni qulini eqqissisimatinneqassasut. Periarfissaq tamanna Naalakkersuisut malinniarnagu aalajangiunnikuuaat.

- Naalakkersuisut kikkut tamaasa matumani naammagisaannik iliuuseqarsinnaanngillat ingammik aamma atuisut tamarmik naammagisaannik aalajangersaasinnaanatik, apeqqummilu matumani Naalakkersuisut atuisut isumaqataaffigikannersinnaasaannik aalajangiisariaqarsimapput.

Sukaterineq
Naaperiaanermi sumiiffinni marlunni appat qaammatini sisamani pinigaasarnissaat siunnerfiuvoq appaqarfiillu ilaani piniagaasarneri aamma sukateriffigineqassalluni.

Appat pillugit Pinngortitaleriffiup innersuussutai piareerpata, Aalisarnermut, Piniarnermut Nunalerinermullu naalakkersuisoq nalunaarutigeriikkami saniatigut sukatereqqissanerluni aalajangerniarpoq.

- Appatassiissutaasartut naleqqussaavigissavakka piniagaasartut ikilisissallugit, sumiiffinni appaarukkiartortuni appat amerlanerulernissaannut periarfissaqartitsissalluni, Nikolaj Jerimiassen erseqqissaavoq.

Imminut pilersornermut tapersersuisoq
- Nammineerluta immitsinnut nerisassanik amerlanerusunik pilersulernissamut aamma neqinik amerlanerusunik pilersornissatsinnut tapersersuisuuvunga nerisassat nunanit allanit pisartakkavut ikilisikkumallugit, soorlu tamanna aamma naalakkersuisooqatigiinnissami isumaqatigiissummi allaqqasoq. Uumasorsiuut, biologit, innersuussutigisartagaat naalaartartorujussuuakka, appat aarlerinarsinnaasumik ikileqqunagit oqaatiginnittarnerinut, Jeremiassen naqissusiivoq.

- Naalakkersuisunit pingaartinneqarpoq innuttaasut kissaataat tusaassallugit. Ilimagineqarsinnaavoq appat eqqissisimatinneqalerpata appatortarnerput iluarinanngitsumik kinguneqarsinnaasoq, meeqqat inuusuttullu appa nerisassatut ilitsoqqussatut soqutigiunnaassallugu.