Angallanneq
Jeremiassen: Qasigiannguani innuttaasunik ataatsimiititsisoqarli
Angallannermi atukkat pitsanngortinniarlugit maanna iliuuseqartoqarnera, Qaasuitsumi kommunalbestyrelsimi ilaasortap Kristian Jeremiassenip nuannaarutigaa. Naalakkersuisoq Qasigiannguani innuttaasunik ataatsimiititsinissaa kajumissaarutigaa
Attaveqaqatigiinnermut naalakkersuisuugallartoq Múte Bourup Egede (IA) angallannermi atukkat pillugu Qeqertarsuarmi innuttaasuni ataatsimiititseqqammerpoq.
Qaasuitsup Kommuniani kommunalbestyrelsimut ilaasortaq, Kristian Jeremiassen (S), angallannermut kiffartuussinermut isumaqatigiissutinut isornartorsiusut ilaat, Múte Bourup Egedep Qasigiannguani sammisaq taanna pillugu maanna ataatsimiititsinissaanik kajumissaarivoq.
Taanna naalakkersuisumut ammasumik allagaqarpoq.
Atuaruk: Qeqertarsuup Disko Line naammatsiffigaa
Qasigiannguanut sinersortaat
Sinersortaat Sarfaq Ittuk tikittalernissaa Qeqertarsuarmi innuttaasut ataatsimiinnermi kissaatigaat.
- Qasigiannguani uagut aamma kissaatigaarput, Kristian Jeremiassen allappoq. Qeqertarsuup Tunuani angallanneq pitsanngorsarniarlugu sulissuteqartoqarnera taassuma nuannaarutigaa.
Atuaruk: Siumumi politikkerip naalakkersuisumik tunuartitsineq nuannaarutigigaa
Periarfissat mississorneqarlik
Qasigiannguit eqqaani imaatigut angalaniarneq ajornakusoortoq oqaatigaa, ingammik silarlutsillugu.
- Iluaqutaalluassaaq Sarfaq Ittuk Qasigiannguanut aamma aqqusaartalerpat. Umiarsuaaqqat maani atorneqartarput, taakkulu ilaasunut naammaginanngillat, Kristian Jeremiassen erseqqissaavoq, Qasigiannguit Sarfaq Ittummik tikinneqartalersinnaanersut naalakkersuisumit misissorneqarnissaa taassuma kissaatigaa.
Atuaruk: Najukkami qinigaq: Kiffartuussinissamut isumaqatigiissutit annertuumik ajornerulerput