Jens-Eriup piumasaqaateqarnera nersualaarneqartoq

- Piumasaqaatit akuersissutigineqarsimannginnerat qinnuteqaatip sivisuallaamik suliarineqarsimaneranik oqalunneq sorraatsuliorneruvoq.

WWF-imimi Generalsekretæriusoq Gitte Seeberg oqarpoq. Aatsitassarsioqatigiiffiup Tanbreez Miningip aatsitassarsiornermut inuussutissarsiornermullu naalakkersuisoq Jens-Erik Kirkegaard Siumumeersoq isornartorsiorpaat qinnuteqaatertik sivisuallaamik suliarineqarsimaneranik.

- Naalakkersuisup aatsitassarsioqatigiiffimmut anngaaginnannginnera nersualaarnarpoq. Tanbreezip paasisariaqarpaa Kalaallit Nunaat aatsitassarsiornermi aamma isertitaqartariaqartoq, Gitte Seeberg oqarpoq.

- Avatangiisit pillugit tusarniaanissamut piffissaliussarineqartut aamma ajunngitsumik suliarineqarput. Erngup nukinga uani atorneqarluarsinnaasoq nalilersorneqarsimanngilaq, taamaattumik Jens-Erik Kirkegaardip oqaasii tapersernarput. Tanbreezip takutippaa pitsaanerusumik sulisariaqarluni.

Naalakkersuisut ilikkagaqarsimasut?
WWF-ip ICC Greenlandillu Kalaallit Nunaanni innuttaasut tusaaniarneqarnerunissaat pillugu pitsaanerusumik sulisoqarnissaa Naalakkersuisunut kaammattuuteqareerput.

- Naalakkersuisut sulianik sissuernerulersimaneranik una isumaqassasoq neriuutigaara, innuttaasunimmi pitsaanerusumik isumasiuisoqartariaqarpoq kiisalu tusarniaanerit aamma pitsaanerullutik, Gitte Seeberg oqarpoq.

Naalakkersuisut qinnuteqaat utertippaat
Tanbreez Miningimik piginnittoq Greg Barnes namminersorlutik oqartussanut utaqqikatappoq Killavaat Alannguanni aatsitassanik qaqutigoortunik atuisinnaanissamut qinnuteqaanni suli akineqanngimmat KNR-imut oqaluttuartareerpoq. Taanna isumaqarpoq kigaappallaamik sulinikkut Nunatta aatsitassarsiorfinngorniarnera kinguarsarneqartoq.

Tanbreez Miningip qinnuteqaatai siulliit utertinneqartarsimapput sukumiinerusumik nassuiaaseqqaarlugit aatsaat suliarineqarsinnaasut unnerlugit.

- Amigaataasorpassuit ilai taaneqarsinnaasut ilaatigut tassaapput: Toqunartoqassutsimut uttoortaanerit amigaataapput (Eqqagassat qanoq toqunartoqartiginersut); Kuummi eqaloqartartumi aalisakkat inissiinermi ajoquserneqannginnissaannik qulakkeerisussat uuttortaanerit amigaataapput; Pujoralaat siammartarnerisa eqqoriarneqarnissaat amigaataavoq; Erngup nukinganik atuisoqarsinnaanersoq nalilersuineq amigaataavoq il.il. Tamatuma saniatigut najoqqutassat oqaatsit eqqortut atorlugit tunniunneqanngillat, Jens-Erik Kirkegaard uparuaavoq.

Taassuma aamma Tanbreez Mining isornartorsiorpaa naammattumik nassuiaasimannginnerarlugu sooq aatsitassat Nunatsinni suliariniannginneerlugit taamalu suliffissanik amerlanernik pilersitsillutik.

Tanbreezip Kalaallit Nunaanni aatsitassanik suliareqqiisarnissaq itigartippaa, aammalu suli tamanna pisinnaassannginnersoq kinaassusersiunngitsumik uppernarsaammik naammattumik nassiussisimanani. Sapinngisamik najukkami suliffissanik pissarsinissamut suliareqqiineq aallaaviatigut Kalaallit Nunaanni ingerlanneqartassasoq, aatsitassanut ikummatissanullu inatsimmi qitiusumik ilaavoq.

Aatsitassat suliarinerinut sulisut 160-it missaat atorneqartussaapput aatsitassallu qallornerinut sulisut 80-it missaat atorneqartussaallutik