siulittaasunngorniuunneq

Jens-Erik Kirkegaardip EU pillugu oqallinneq tikilluaqquaa

Jens-Erik Kirkegaard isumaqarpoq nunatta EU-mut qanillinerusinnaanera pillugu oqallinnissamut kaammattuuteqarneq ersissutigineqartariaqanngitsoq

- Paasisinaavara ernumanartoqartinneqarpat EU’p nunatta pisuussutai akuleruffiginiarsarissappagit nunarput qulaallugu, Jens-Erik Kirkegaard oqarpoq

Inuussutissarsiorneq, aatsitassat suliffeqarnerlu pillugu Naalakkersuisuni ilaasortaasimasup, Jens-Erik Kirkegaardip, EU pillugu oqallinneq tikilluaqquaa.

- Paasisinaavara ernumanartoqartinneqarpat EU’p nunatta pisuussutai akuleruffiginiarsarissappagit nunarput qulaallugu, Jens-Erik Kirkegaard aallartippoq.

- Kisianni EU taamaattuunngilaq, Jens-Erik Kirkegaard nangippoq.

Atuaruk: Jens-Erik Kirkegaard Nick Nielsenimut tapersersuivoq

Jens-Erik Kirkegaardi Nick Nielsen peqatigalugu Naalakkersuisunit, Aleqa Hammondip nunatta karsianik atuisarsimanerata kinguneranik, oktobarip aallaqqaataanit tunuartup maanna EU’p oqallisigineqarnissaanut, Nick Nielsenip Siumumi siulittaasussatut sassartoq taperserlugu, aamma nalunaaruteqarpoq.

- Uani eqqartorneqartussami inuiaqatigiit isummersorfigisassaat tassaavoq EU ullumikkut nunatsinnut tulluarnersoq, Jens-Erik Kirkegaard oqarpoq.

- EF qimatarput ukiut 30-it matuma siorna allaavoq, EU ullumikkut ineriartornikuuvoq, oqallinneq, nalilersuinerlu pisariaqarpoq, qunugisariaqanngilarput oqallinneq, Jens-Erik Kirkegaard oqarpoq.

Atuaruk: Nick Nielsen: Innuttaasut EU eqqartortariaqalerpaat

Taamaammat isumaqarpoq eqqaamasariaqaripput EU ilaasortat nunaasut namminiussusillit:

- Assersuutigalugu Danmark EU’mut ilaasortaavoq, kisianni Danmark uuliaatilissuuvoq, taakkua EU’p oqartussaaffiginngilai.

- Eqqaamasassaavoq aamma nunat assigiinngitsut oqartussaapput nunaminni pisuussutinut, tamanna ilaatigut FN’imi ilaasortat aalajangigaanni takuneqarsinnaavoq, Jens-Erik Kirkegaard nangippoq.

- Atagu oqallisigeqqaartigu, ilisimasagut annertusaqqaartigit, nunatsinnut iluaqutaasinnaasut ajoqutaasinnaasullu qulaajaqqaartigit, oqarpoq.

Atuaruk: Doris: EU pisuussutitsinnit pissarsissanngilaq

Powered by Labrador CMS