Siulittaasunngorniunneq

Jens-Erik Kirkegaard Nick Nielsenimut tapersersuivoq

Siumumi siulittaasunngorniunnissami Nick Nielsen parteeqatiminit marlunnit tapersersorneqarpoq

Jens-Erik Kirkegaard (saamerleq) aamma Nick Nielsen Naalakkersuisutut tunuartut oktobarip aallaqqaataani. Tusagassiortunik katersortitsinermi assilineqartoq

Siumumi kina siulittaasunngussanersoq arfininngorpat taasissutigineqassaaq. Partiimuinnaanngitsoq, aamma nana tamakkerlugu siulittaasunngortoq annertuumik akisussaaffimmik tigusissaaq.

Siumut immikkut ittumik ataatsimeersuarnerani siulittaasumik qinersisoqassaaq. Doris Jakobsen, Kim Kielsen aamma Nick Nielsen siulittaasussatut qinigassanngortipput.

Nick Nielsen parteeqatiminit marlunnit tapersersorneqarpoq, Jens-Erik Kirkegaardimit aamma Kommuneqarfik Sermersuumi kommunalbestyrelsimi ilaasortamit Peter Davidsenimit aamma Siumumeersumit.

- Nick Nielsenip saqqummiussai tunngavigalugit tapersersornartillugit matumuuna nalunaaritigaarput. Nicki Qasigiannguani aalisartukkormiuni peroriartorpoq, inersimasunngornermini ilinniagaqarluarpoq. Nunatsinni inooriaatsimik ilisimasaqarluarpoq, aammalu nunarsuarmioqataanermik ilisimasaqarluarluni.
Nunarsuarmi qaqqat portunersaat kalaallini siullersaalluni, kisiartaagallarlunilu, qaqinikuuaa.Angusaq imaannaanngitsoq, aatsaat suleqateqarluni pilersaarusiorluarnikkut anguneqarsinnaasoq, kisianni aamma angisuumik takorluuisinnaassusermik takutitisoq. Taakku angusat takutippaat Siumumi siuttuunissaminut piukkunnassuseqartoq, Jens-Erik Kirkegaard aamma Peter Davidsen tusagassiutinut nalunaaruteqarput.

Politikkikkut anguniakkat
Nick Nielsenip politikkikkut anguniagai tapersersorpaat.

- Siulittaasunngorniunnermut nalunaarnermini anguniakkat tigussaasut oqallisaasinnaasullu saqqummiussimmat Siumup alloriaqqinnissaanut tunngavissaasinnaasunik tapersernatitatsinnik, soorlu EU pillugu suleqateqarnerusinnaanermik inuiaqatigiit nalileeqqinnissaat, taamaasilluta aamma nunarsuarmioqataanerunissamut periarfissat eqqartussagatsigit.
Minnerunngitsumillu angallannermi assartuinermilu eqaallisaanissaq, tusagassiutinut nalunaarummi allapput.

Nunatsinni oqaatsitta nukittorsarnissaanut aammalu inuiattut anersaakkut nukittorsarnissamut Nick Nielsenip isummersuutai Jens-Erik Kirkegaardimit Peter Davidsenimiillu aamma ilalernartinneqarput.

Jens-Erik Kirkegaard aamma Nick Nielsen Aleqa Hammondip aningaasanik atornerluisimanera pissutigalugu Naalakkersuisutut oktobarip aallaqqaataani tunuarput.

Powered by Labrador CMS