Hot
Jens-Erik K: Urani pillugu mattussinngilagut
Aviisip ullormut saqqummersartup Information-ip inuussutissarsiornermut aatsitassanullu Naalakkersuisoq Jens-Erik Kirkegaard ulloq naallugu malinnaaffigisimavaa, ilaatigut uranimik oqallinneq iserfigalugu
Jens-Erik Kirkegaardip habitsimi kavaajaa taartoq nammakkiuppaa puussiarlu plastikki pappiaqqanik ulikkaartoq tigullugu.
– Ministerimik ataatsimeeqateqarnissani atuagassamerngit, oqarpoq illarlunilu.
– Ullumi aamma suliassat marluk nassarpakka.
– Sumut tunngasut?
Aviisi ullormut saqqummersartoq Information Nuummissimavoq inuussutissarsiornermut aatsitassanullu Naalakkersuisoq Jens-Erik Kikrkegaard ilisaritinniarlugu. Tamanna pivoq allaaserisami: Aatsitassanit isaatitsilerutta. Information-imut Jens-Erik Kirkegaard oqarpoq:-
– Tamanna suli isertuussaavoq, aammalu ... aamma aappaa.
Aviisip Naalakkersuisoq sulisoq malinnaaffigaa. Ukiup ataatsip matuma siornatigut inuiaqatigiinni oqallissaarisuusimavoq Tele-milu IT-lerisuulluni. Ullumikkut politikkimi pingaarnerpaat ilaannik suliffeqarpoq. Naalakkersuisuusimasut aatsitassanik ingerlatsisimanerannik isornartorsiuinerpaat ilagisimavaat.
– Sammisat piiuminaatsut kalaallisut paasiuminartumik nassuiarsinnaagakkit nersualaarneqarsimavunga. Inuit kajumissaarpaannga Inatsisartunut qinersinermi qinigassanngorteqqullunga, Jens-Erik Kirkegaard oqaluttuarpoq.
Allaaserisami Jens-Erik Kirkegaardip ilaatigut tikippaa Nunatsinni politikkimi sammineqarnersaasa ilaat, tassalu urani. Uran ukiakkut ataatsimiinnermi oqaluuserineqassaaq. Aperineqarpoq:
– Kisiannimi urani piiarneqassannginnami aatsitassanik qaqutigoortunik piiaanermi annerpaamik saniatigut tunisassiatut?
– Maannangaaq sumilluunniit mattussinngilagut, Jens-Erik Kirkegaard oqarpoq.
– Uranimik piiaanissaq pillugu innuttaasunik ataatsimiititsisussaavugut. Ilisimajuminaappoq ilumut taama akerleritigineqartiginersoq, tassami tamatigut isornartorsiuisut kisimik tusagassiorfitsigut tutsiuttarmata. Taamaattumik tamanna paasiniassavarput.
Allaaseritaq tamaat atuarsinnaavat linki una atorlugu
Jens-Erik Kirkegaard ilumoorpa? Isornartorsiuisut kisimik tusagassiorfitsigut tutsiuttarpat? Nipangersimaannartut amerlanerussuteqartut ilagaatsit? Urani qanoq isumaqarfigaajuk?