Aleqap atornerluinera

Jens-Erik Inatsisartuni aamma ilaasortaajunnaarusuppoq

Tusagassiortunut katersortitsinermi Jens-Erik Kirkegaardip nalunaarutigaa Naalakkersuisutut tunuarluni - aamma Inatsisartunit tunuarniuteqarniarluni oqaatigaa

Naalakkersuisutut tunuartut Siumumeersut. Saamerlermit Jens-Erik Kirkegaard kiisalu Nick Nielsen

- Inatsisartuni ilaasortaajunnaarniarlunga qinnuteqarniarpunga.

Siumumit Jens-Erik Kirkegaard tusagassiortunik katersortitsinermi oqarpoq. Tassani nalunaarutigaa inuussutissarsiornermut aatsitassarsiornermullu naalakkersuisutut tunuarluni.

Nick Nielsen, Steen Lynge aamma Siverth K. Heilmann naalakkersuisutut tunuarlutik aamma nalunaaruteqarput.

Naalakkersuisut siulittaasuata Aleqa Hammondip nunatta karsianit 106.363,27 koruuninik namminerminut ilaquttaminullu atuisimanera pillugu naalakkersuisutut kinguneqartitsillutik tunuarput.

Jens-Erik Kirkegaard Nick Nielsenilu ilaatigut ima tusagassiutinut nalunaaruteqarput:

- Isumaliutissiissummi – saqqummiunneqaruni – Nunap Karsiata pisuni arlalinni
akiliutigeriaannagassatut taarsigassarsivittut atorneqarsimanera allanngortinnavianngilaa. Iliuutsit aalajangiinerillu isumaqatigisinnaajunnaaraanni qimaguttoqartariaqarpoq. Taamaammat ullaaq manna nalunaarutigaarput Naalakkersuisuni ilaasortaajunnaarluta, marluullutali Siumumi naleqartut inunnillu isiginneriaatsit suli sorsuutigissavagut.

Naalakkersuisuujunnaarnertik naapertorlugu qinersisoqarnissaa Jens-Erik Kirkegaardip kissaatiginngilaa.

- Kim Kielsen tatigaarput. Aamma misissuisoqarnerani tapersersussavatsigit, Jens-Erik Kirkegaard oqarpoq.

Powered by Labrador CMS