Huskebogen
Jens B: Suli "peqquserluttuliorneruva kammalaatersornerullunilu?"
Miiti Lyngep aatsitassanut akuersissutini annaavaa, uiatali akuersissutini pigiinnarpaa. Jens B. Frederiksenip eqqaamavaa Aleqa Hammondip illua'tungiliuttuugallarami kammalaatersornermik pasilliinera. Maanna qisuariaateqarnissaa utaqqivaa
Demokraatit soqutiginartippaat tusassallugu Naalakkersuisut siulittaasuata Aleqa Hammondip taamanikkut illua'tungiliuttuugallarami aviisimut AG-mut Ritzau-mullu oqaatsini makkua aalajangiusimanerai:
"Apeqqutigerusuppara tamanna kammalaatersornerunnginnersoq peqquserluttuliornerunnginnersorlu, namminerlu oqarsimapput tamanna allanngortinniarlugu", aviisimullu AG-mut Aleqa Hammond 2010-mi septembarip 8-anni oqarpoq:
"Nammineq inuttut isumaqarpunga ileqqorissutsikkut ileqqulersornikkullu akuerineqarsinnaanngitsoq".
Aamma atuaruk: Miitip pinnersaatinut akuersissutini tunniuttariaqarpaa
Issuaanerit tamakkua ullumi Demokraatineersup Jens B. Frederiksenip saqqummiuppai, paasineqarmat Naalakkersuisunut ilaasortap Miiti Lyngep aatsitassanut akuersissutini tunniuttariaqaraa. Taamaatut aalajangiivoq Qinigaasinnaanermut Ataatsimiititaliaq.
– Allassimanngilarli uia aamma taamaasiorniarnersoq, Jens B. Frederiksen oqarpoq, isumaqarporli partiimi inuinnaat suliniutaat suulluunniit aallartitsiniarnerillu tapersersorai. Taamaasilluni ajornartorsiutiginngilarput Miiti Lyngep aamma/imaluunniit uiata aatsitassanut akuersissuteqarnera.
Taamaakkaluartoq paragraf 37 naapertorlugu Naalakkersuisunut apeqquteqarnermini aperivoq Naalakkersuisut isumaqarnersut ileqqorissutsikkut ileqqulersornikkullu akuerineqarsinnaasoq, Miiti Lyngep uia sumiiffimmut killilimmut annikitsumik kisermaassilluni akuersissummik peqarmat?
Tamatuma saniatigut paaserusuppaa Naalakkersuisut suli isumaqarnersut Naalakkersuisunut ilaasortap aappaataluunniit aatsitassanut akuersissummik peqarnera tassaasoq peqquserlunneq kammalaatersornerlu?
– Taamaassimanngippat isummap allanngorneranut itisiliissummik nassuiaateqaqqusivunga, Jens B. Frederiksen oqarpoq, ilanngullugulu paaserusuppaa Miiti Lyngemut qanoq kinguneqassanersoq uiata aatsitassanut akuersissunni pigiinnarusuppagu?