appat
Januaarip aallaqqaataani appanniarneq unissaaq
Nunatta annersaani appanniarneq ukiortaamit unissaaq. Qaanaap eqqaani piniarneq taamaallaat ingerlasinnaassaaq
Januaarip aallaqqaataani timmissat pillugit nalunaarut nutaaq atuutilissaaq.
Tamatuma kingunerissavaa, Upernavimmiit kujammut sineriak tamaat, Tunu ilanngullugu appanniarneq appanillu tuniniaaneq unissaaq.
Aqutsiveqarfimmi Qaanaami tamaallaat appanniarneq februaarip 28-ata tungaanut ingerlaannarsinnaassaaq.
Atuaruk: Atuisut nannunut appanullu pilersaarusiornernut peqataatinneqartut
Nalunaarummi tassani appanniarneq annertuumik sivikillineqassaaq. Taamaalilluni siunissami aqutsisoqarfinni assigiinngitsuni appanniarneq taamaallaat qaammammi ataatsimi affaanilu aamma qaammatini marlunni sivisussuseqalissaaq, tassani Qaanaaq ilanngunnagu.
Qaanaami annikilliliineq annikinneruvoq.
Piniarfiusut annertuumik annikilliliiffigineqarneri biologit siunnersuinerat aamma atuisut ilisimasaat tunuliaqutaralugit pivoq, aalisarnermut piniarnermut naalakkersuisoqarfik tusagassiuutinut nalunaarummi allappoq.
- Appat pillugit ilisimasat nutaanerpaat takutippaat, Kalaallit Nunaanni appaqarfinni amerlanerpaani appat annertuumik ikiliartortut, Qaanaami appaqarfiit kisiisa pinnagit taakku amerlassutsimikkut ajornartorsiutaanngimmata, tusagassiuutinut nalunaarummi allaqqavoq.
Naalakkersuisoqarfik naapertorlugu Qaanaaq eqqaassanngikkaanni, tamakkiisumik 35-40 procentimik ikileriartoqarpoq.
Ikileriarnerat piniarnerinnarmik pissuteqanngilaq, kisianni aamma timmissat ukiisarfiini silap pissusiata allanngoriartornera pissutaavoq.
Atuaruk: Jerimiassen: Piniagassanik nungusaanngilagut
- Piniarnermilli annikillisitsineq manna tikillugu Kalaallit Nunaanni aqutsisinnaanermut periarfissaasinnaasut kisiartaraat, naalakkersuisoqarfik allappoq.
Appat (Ritenbenk) Ilulissat eqqaaniittoq piniarnernut tamanut eqqissisimatitsiviulerpoq.
Allaaserisap talerpiata tungaani piffissat appanniarfiusut takusinnaavatit.