Ilisimatusarfik
Jakob Janussen ataqqinaammik doktorinngortinneqartoq
Ilisimatusarfimmi nalliuttorsiornermut tunngatillugu Namminersornerullutik Oqartussani pisortaasimasoq doktorinngortinneqarpoq
Ukiut tamaasa Ilisimatusarfik Universitetip pilersinneqarniarnera malunnartinniarlugu nalliuttorsiortarpoq. Tassungalu tunngatillugu ataqqinaammik doktorinngortitsisoqarpoq.
Namminersornerullutik Oqartussani pisortaasimasoq, Jakob Janussen, ukioq manna ataqqinaammik doktorinngortinneqarpoq.
- Jakob Janussen Namminersornerullutik Oqartussani pisortaasimavoq, Namminersorneq Pillugu Ataatsimiititaliarsuarmi siulittaasuusimalluni aammalu kalaallit qallunaallu Namminersorneq Pillugu Ataatsimiititaliarsuata allattoqarfiani pisortaasimalluni. Kiisalu Jakob Janussen ukiorpassuarni inuiaqatigiinni oqalliseqataasarsimavoq taamatullu suliaqarnermigut Kalaallit Nunaanni inuiaqatigiit ineriartornerannut annertuunik tunniussaqartarsimalluni, Ilisimatusarfik tunngavilersuilluni allappoq.
Politikkikkut sulinissamik ilusilersuineq
- Jakob Janussenip inuiaqatigiit kalaallit akornanni pingaaruteqartumik qaammarsaanermut ilinniartitsinermut, politikkikkut sulinissamik ilusilersuinermi aammalu Namminersornerullutik Oqartussat ulluinnarni allaffissornikkut sullinneqarnerannut atatillugu suliarpassui tunngavigalugit matumani Ilisimatusarfimmi ataqqinaammik doktorinngortinneqarpoq.
Ph.d-mut uppernarsaatit marluk tunniunneqartut
Nalliuttorsiornermullu tunngatillugu ph.d.-mut uppernarsaatit marluk aamma ukununnga tunniunneqarput:
Andreas Møller Jørgensen allagartartaarpoq soraarummeerutini: The Power Inherent in E-Democracy: Greenlandic Experiences, Practices, and Visions tunngavigalugu.
Ann Eileen Lennertilu pappialartaarpoq soraarummeerutini: A Millennium of Changing Environments in the Godthåbsfjord, West Greenland - Bridging cultures of knowledge tunngavigalugu.
- Ilinniarneq piginnittuulernermik tigusineruvoq. Ilinniagaqarnermi inuiaqatigiinni allanit tamanit annertunerpaamik allannguisuusarpoq. Tassami ilinniagaqarneq aningaasaqarnermut, attartussutsimut, peqqissutsimut, ineriartornermut, allannguinermut allarpassuarnullu pingaaruteqarami, rektoringallartoq Suzanne Møller, tunniussinermi oqarpoq.