Legatit
Ivalo & Minik Fondenip ilinniartut pingasut nunanut allanut ilinniariartippai
Aningaasaateqarfimmi Ivalo & Minik Fondenimi siulersuisut marsip qaammataani ukiup affakkuutaartumik ataatsimiinnerminni aalajangerput legatinik pingasunik 280.000 koruunit nalinginut agguaassiniarlutik.
Malaysia, New Zealand aamma Italien. Nuna taakku ilinniartut pingasut ukiup affaani imaluunnit ukiumi ataatsimi ilinniarfigissavaat.
Ivalo & Minik Fondenip taakku pingasut nunanu allanut ilinniariartortippaat.
- Nunatsinni aamma/imaluunniit Danmarkimi avatangiisit toqqissisimanartut sungiusimasallu qimallugit kalaallit piginnaasanik nutaanik pissarserusuttut aningaasatigut tapersersornissaannik siunertaqarluni aningaasaateqarfik pilersinneqarpoq, aningaasaateqarfiup siulittaasua Minik Rosing oqarpoq.
Uku pingasut nunani allani misilittakkanik katersiartussapput:
- Martin Christiansen Romimi John Cabot Universitymi (Aningaasaqarnermut Inuiaqatigiinnillu ilisimatusarnermut Fakultetimi) semesterini marlunni ilinniarnissaminut legatinnappoq.
- Sara Biilmann Egede New Zealandimi University of Otagomi semesterimi ataatsimi ilinniarnissaminut legatinnappoq. Tassani nittarsaassineq atuisullu pissusilersuutaat pingaarnerutillugit ilinniassaaq. Semesterimi ataatsimi ilinniarnera Roskilde Universitetimi Pilersaarusiukkamik attaveqaqatigiinnermut Master Degreeqalerniarneranut atatillugu isigineqassaaq.
- Bettina Søgaard Malaysiami Swinburne University of Technologymi semesterimi ataatsimi ilinniarnissaminut legatinnappoq. Taanna Syddansk Universitetimi Diplomingeniørinngorniartuuvoq (Global Management and Manufacturing).
- Legatinnattut piginnaasarpassuarnik inuiaqatigiit ineriartorteqqinnissaannut atorneqarsinnaasunik nassarlutik Nunatsinnut uternissaat neriuutigaarput, Minik Rosing oqarpoq.
Ukiormanna legatinnannissamut qinnuteqarfissap tullia oktobarip aallaqqaataanut killeqarpoq.