Ivalo & Minik Fonden ilinniartunut pingasunut legatinik tunniussaqarput

Ivalo & Minik Fondenimi siulersuisut marsip qaammataani ukiup affakkuutaartumik ataatsimiinnerminni legatinik pingasunik 300.000 koruunit sinnilaarlugit naleqartunik agguaassiniarlutik aalajangerput.

- Kalaallit Nunaata, nunat allat assigalugit, inuit ilinniarluarsimasut pisariaqartilluinnarpai, taamaammat nuannaarutigaara uagut Ivalo & Minik Fondenimi legatinik agguaassisarnitsigut tamatumunnga aqqutissiueqataanissamut periarfissaqaratta. Tassungalu atatillugu uatsinnut tunissuteqartut qutsavigerusuppakka - taakku tunissuteqarnermikkut - Kalaallit Nunaanni ilinniartitaanikkut qaffassaaqataanermikkut inuiaqatigiinni akisussaaqataanerminnik annertuumik takutitsimmata, Ivalo & Minik Fondenimi siulersuisuni siulittaasoq Minik Rosing, tusagassiuutinut nalunaarummi oqarpoq.

Legatimik pissarsisut ukuupput:

• Frederik Bork Jansen DTU-mi teknikkimut tunngasumik ilisimatuussutsikkut ilinniarnerminut atatillugu Australiami Monash Universitymi masterinngorniarnermini semesterimi ataatsimi ilinniarnissaminut legatinnappoq.
• Inga Hansen nunap inoqqaavi pillugit tusagassiorneq pillugu Norgemi Sami Universitetimi masterinngorniarnerminut legatinnappoq.
• Winnie Filemonsen nutserisutut oqalutsitullu Ilisimatusarfimmi ilinniagaqarnerminut atatillugu USA-mi North Carolinami Duke Universitymi semesterimi ataatsimi ilinniarnissaminut legatinnappoq.

Ivalo & Minik Fondenip legatinik agguaassisarnini soorunami ingerlatiinnassagaa ilisimatitsissutigineqarpoq. Tulliani qinnuteqarnissamut killigititaq tassaavoq oktobarip aallaqqaataani 2018, siulersuisullu qinnuteqaatinik pitsaasunik amerlasuunik tigusaqarnissartik qilanaarivaat.

Legatit Royal Arctic Line A/S-imit, Royal Greenland A/S-imit, GrønlandsBANKEN-ip Inuussutissarsiornermut aningaasaateqarfianit NunaFondenimillu tunissutit tunngavigalugit 100 procentimik aningaasalersugaapput.