Legatit
Ivalo & Minik Fonden aningaasarpassuarnik agguaaqqippoq
Aningaasaateqarfimmi Ivalo & Minik Fondenimi siulersuisut arfinilinnik legatinik agguaapput
Fonden 399.000 koruunit.
Legatinik agguaanermi aningaasaateqarfik Ivalo & Minik Fonden taama amerlatigisunik aningaasanik agguaavoq.
- Legatinnattut pissarsiffiulluartumik nunani allaniinnissaat, kingornalu Nunatsinnut uterumaarnissaat aammalu ilisimasanik pissarsiarisaminnik atuilluarnissaat neriuutigaara, Ivalo & Minik Fonden siulersuisuini siulittaasoq Minik Rosing oqarpoq. Aningaasat agguaanneqartut Nunafondenimit, Royal Greenlandimit, Royal Arctic Linemit Grønlandsbankenillu Inuussutissarsiornermut aningaasaateqarfianit tunissutaapput, tamannalu aamma qujassutissaqarfigaa.
Legatinnattut:
- Alex Amâsa Olsen, Danmarks Tekniske Universitetimi ingeniørinngorniarnerminut atatillugu, Australiami ilisimatusarfimmi University of Queenslandimi Brisbanemiittumi semesterimi ataatsimi ilinniarnissaminut legatimik tunineqarpoq.
- Ane Eva Lange, Danmarks Tekniske Universitetimi ingeniørinngorniarnerminut atatillugu, Norgemi teknikkikkut pinngortitarlu pillugu ilisimatuussutsikkut ilisimatusarfimmi Trondheimimiittumi semesterimi ataatsimi ilinniarnissaminut legatimik tunineqarpoq.
- Anne Eileen Lennert Norgemi Issittumi pissutsit pillugit Ilisimatusarfimmi PhD-nngorniarluni ilinniarnerminut legatimik tunineqarpoq. Silap pissusiata allanngoriartornerata Kalaallit Nunaanni pinngortitamut piffissaq ungasinnerusoq eqqarsaatigalugu sunniutissai tassani misissuiffigissavai.
- Inuuteq Storch New Yorkimi ICP-mi - International Center of Photographymi - assiliisartutut ilinniagaqarnissaminut legatimik tunineqarpoq.
- Nick Bæk Heilmann Kinami Bejingimi Renmin Universitymi Kina nutaaliaasoq pillugu ilisimatusarluni kandidatinngorniarnissaminut legatimik tunineqarpoq.
- Trine Jul Larsen Norgemi Issittumi pissutsit pillugit Ilisimatusarfimmi Tromsømiittumi Master of Public Healthinngorniarnissaminut legatimik tunineqarpoq.
Ivalo & Minik Fondenip legatinik agguaassisarnini soorunami ingerlatiinnassavaa. Tulliani qinnuteqarnissamut killigititaq tassaavoq oktobarip aallaqqaataa.