Tunu
Ittoqqortoormiini poorskikkunni skakkimik pikialaartitsisoqassaaq
Islandermiut skakkertartut peqatigiiffiat Hrókurinn Ittoqqortoormiini ukiumoortumik skakkimik pikialaartitsissaaq poorskikkunni
‘Nuannaarneq tunaartaralugu’ qulequtaralugu islandermiut skakkertartut peqatigiiffiat Hrókurinn Ittoqqortoormiini poorskikkunni skakkimik pikialaartitsissaaq, aqagu sisamanngornermi illernartumi aallartittussamik illoqarfiup atuarfiani, Ejnar Mikkelsenila Aluarpiani, ilaatigut meeqqanut inersimasunullu skakkernersuarmik malitseqartinneqartussamik.
Illoqarfik allorniusat 70 gradiani inissisimavoq, inoqarfimmullu qaninnerpaamut, tassa Ammassallip eqqaanut, 1000 kilometerinik ungasissuseqarluni.
- Skakkimik peqatigiiffiup Hrókurinnip ukiuni qulinngulersuni illoqarfik ukiut tamaasa tikeraartarsimammagu Ittoqqortoormiini skakkimik ilisimasat Kalaallit Nunaanni annertunerpaajupput, Islandermiut skakkertartut peqatigiiffiat Hrókurinn taama allappoq.
Tallimanngornermi tannaartumi skakkimik unammiuaartoqassaaq peqataasut tamarmik Bónusimiit poorskip mannianik tunineqassallutik allanillu akissarsillutik ujaminnallutillu.
Assit takukkit: Meeqqat periarsinnaanermut sungiusarneqartut
Ataasinngorpat, poorskip ulluisa aappaanni, pikialaarneq naggaserlugu ‘Islandip Kalaallillu Nunaata ikinngutigiittut ulluat’ nalliussinneqassaaq.
- Ikinngutitta, Kalaallit Nunaanni skakkernermik ilisimasaqarnerpaajusut, Ittoqqortoormiiniittullu takoqqinnissaat qilanaaraarput. Illoqarfimmi tassani meeqqat tamarmik skakkersinnaapput, ilaallu neriunaateqarluartuupput. Pingaarnerpaajuvorli kikkut tamarmik peqataasinnaanerat, skakkernerlu nuannersutut isigineqarnissaa, skakkertartut peqatigiiffiat taama allappoq.
Assit takukkit: Meeqqat periarsinnaanermut sungiusarneqartut
Hrókurinnimiit peqataassapput Hrafn Jökulsson skakkimik peqatigiiffiup siulittaasua nunatsinnukallammaarlu Jón Grétar Magnússon.
Skakkertartut peqatigiiffiannit ilisimatitsissutigineqarpoq Ittoqqortoormiiliarneq arlalippassuarnit aningasaliiffigineqartoq, tassami pingaarnertut aningaasaliisuuvoq Kommuneqarfik Sermersooq, Norlandair, TELEPOST, Air Iceland, Úrsus, Bónus, Nói Sirius, Henson,Ísspor, Sögur útgáfa, Útivist&Sport allarpassuillu.
Soorlu aamma arnat Reykjavikimi Røde Korsimi qilattaasartut tunissuterpassuaqartut.
Assit takukkit: Tunumi skakkimik unammisaqattaartut