Ittoqqortoormiini nannut pillugit innuttaasunik ataatsimiititsisoqassaaq

Nannut amerligaluttuinnartut Ittoqqortoormiit eqqannguannut pisalersimapput, imaluunniit illoqarfimmut appakaativittarlutik, innuttaasunik ersiortitsillutik.

Taamatut pisoqartillugu inuit nannullu aporaattarnerat annikillisarniarlugu WWF Verdensnaturfonden marlunngorpat Ittoqqortoormiini innuttaasunik ataatsimiititsiniarpoq, paasiniarlugu aaqqiissutissat suut innuttaasut apersuutigineraat, WWF Verdensnaturfonden tusagassiorfinnut nalunaarutikkut paasissutissiivoq.

WWF innuttaasunik ataatsimiititsinermi neqeroorutigissamaarpaa inuit nannulllu illoqarfimmi aporaattarnerat annikillisarniarlugu suliniutiginiakkanut aningaasaleeqataajumalluni.

– Pingaaruteqarpoq aaqqiissutissat tamakkua sumiiffimmit tunngaveqarpata innuttaasunillu amerlasuunit ujartorneqarlutik. Taamaattumik innuttaasunik ataatsimiititsiniarpugut, inuit isumassarsiaminnik saqqummiussisinnaallutik, suliassaq qanoq pitsaanerpaamik aallartinneqassanersoq, inunnut nannunullu siunissaq pitsaanerusoq anguniarlugu, John Nordbo, WWF Verdensnaturfondenimi avatangiisinut tunngasunut pisortaq, ataatsimiinnermilu peqataasussaq, oqarpoq.

Ajornartorsiut siusinnerusukkut WWF-ip nalunaarusiaani ´På tynd is´ sammineqarsimavoq, aasallu ingerlanerani immikkut ajornartorsiutaasimalluni, tassa nannuttassat nungunneqareermata, imarlu sikoqanngimmat nerisassaaleqillutik nannut kaattut nerisassarsiorlutik nunamukartarmata. Ittoqqortoormiini ukiumut nannuttassanit maannakkorpiaq pingasuinnaat sinnerussimapput, taamaattumik ajornartorsiut qanittukkut annertuseqqissinnaavoq, WWF tusagassiorfinnut nalunaarutikkut naliliivoq.

WWF-ip ajornartorsiut tamanna ullumikkut Nunavummi, Alaskami Canadamilu sammereerpaa, taakkunani ilaatigut aaqqiissutigineqarsimalluni nannunik nakkutilliisunik pilersitsinerit, tamakkualu nannut ersisaarlugit silaannarmut aallaallutik imaluunniit patruunit gummit atorlugit qimaatittarpaat, qimminut nerukkaatissanut containerit immikkut ittut atorneqarput nannut qaninngoorniarpallaaqqunagit, suliniutillu allat, Verdensnaturfonden tusagassiorfinnut nalunaarutikkut oqaluttuarpoq.

Innuttaasunik ataatsimiititsinermi paasiniarneqassaaq aaqqiissutissat taamaattut Ittoqqortoormiini atorneqarsinnaanersut, imaluunniit allarluinnarnik aaqqiissutissarsiortoqassanersoq, Rune Langholff, WWF-imeersoq tusagassiorfinnut nalunaarutikkut paasissutissiivoq, ilanngullugulu oqaatigalugu Ittoqqortoormiini ullumikkut suliniuteqartoqamisaareersimasoq, WWF-illi ataatsimiititsinissami anguniaraa aaqqiissutissanik aaqqissugaanerusunik pilersitseqataanissaq.

WWF-ip nalunaarutigaa innuttaasunik ataatsimiititsinermi oqalutseqarumaartoq.