Itigartitaanerup kingorna: - Paniga nikalluallattorujussuuvoq

Pavia Joelsenip panini Isabel Ane qujagisaraa.

Ukiuni arfineq-marlunni kisimi perorsarsimavaa, Aarhusimilu atuarfimmi angusarisartagai oqaluttuarigamigit ataataasup tulluusimaarnera tusaaneqarsinnaavoq.

Taamaammallu inissiami Vibymi atuarfiup ungasinngisaani nassaarnissani pingaartissimavaa, niviarsiaraq qulingiluanik ukiulik tassani atuaqqinniassammat.

Vibymilu nassaaramik ilaqutariiarannguit qiimmattarput.

- Atuarfiup ungasinngisaani inissiamik ilimasaarneqarsimalluta oqaluttuarama nuannaatsattorujussuuvoq, Pavia Joelsen Sermitsiaq.AG-mut oqaluttuarpoq.

- Mailimik pissarsisimallunga oqaluttuarfigaara, inissianillu attartortitsisartoq sianerfigiinnarlugu isumaqatigiissuteqarniarlunga.

Kisianni oqarasuaatikkut oqaluussinerup nuannaarneq illuanut mumisippaa. Pavia Joelsen inissianik attartortitsisartut Dueholm & Krøyerimi pisortat ilaannut nuunneqarpoq, taassumalu nunanit allaneersuunersoq aperaa.

Kalaaliunerarami nunanit allaneersunit attartortitsisaratik nalunaarfigineqarpoq. Danskisut innuttaassuseqarluni Danmarkimilu ukiuni qulingiluani kingullerni najugaqarnikuunera apeqqutaasimanngilaq.

- Paninnut oqaluttuarigakku nikalluallattorujussuuvoq, Pavia Joelsen oqarpoq.

- Sooq taamatut pineqartariaqarnersugut paasisinnaanngivippaa. Danmarkimi peroriartornikuuvoq, pingasunik ukioqartorli tamaani najugaqalernikuuvugut.

Dueholm & Krøyerimi piginnittoq, Christian Krøyer, nunanit allaneersunut aamma kalaallinut attartortitsinissartik kissaatigineq ajorlugu JP Aarhusimut oqarpoq.

- Systemerput paasisinnaanngimmassuk attartortitsineq ajorpugut, taanna aviisimut oqarpoq.

Pavia Joelsenip taamatut immikkoortitsisoqarsinnaanera paasisinnaarpianngilaa.

- Inunnik taamatut immikkoortitsineq ilumoorsinnaanngilaq, taanna oqarpoq.

- Danskisummi innuttaassuseqarpunga, kisianni taassuma suutinneraanga paasisinnaanngilara, taanna oqarpoq.

Taamatut misigisaqarnini Facebookikkut allaaseraa, Kamikpostenillu oqaluttuaraa. Kingornalu suliaq attaveqaqatigiittarfitsigut, kingullermillu Jyllands Postenimit maluginiarneqarpoq.

Tamannali Pavia Joelsenip aamma Isabel Anep ineqarniarnermik ajornartorsiornerannik aaqqiissuteqarneranik kinguneqanngilaq. Utaqqiisaasumik inissiamik neqeroorfigineqaraluarput, kisianni iluatsinngitsooqqammerpoq.

Maanna isumaqatigiissutigisaa tallimanngorpat qaangiutissaaq, ataasinngorpat tungaanut kinguartitsiffigineqaraluarluni arfininngorpat nuussaaq. Sumunnarfissaat: Ilisimaneqanngilaq.

- Paniga tallimanngorpat spejderinit tammaarsimaareerluni angerlassaaq. Uanga utaqqiisaa pisattagut poortorpakka.

Aasaanerani sulinngiffeqarnerup nalaani utaqqiisaasumik aaqqiissutissamik nassaarnissamik, Pavia Joelsen neriuuteqarpoq. Ukiup atuarfiusullu aallartinnginnerani atuarfiup ungasinngisaani inissarsinissartik siunniuteqqavaa.

Kisianni naggataagut atuarfimmut sivisuumik angalaqqaartariaqartumut imaluunniit atuarfimmut allamut nuuttariaqarnissaanik aalajangeratarsinnaavoq.

- Maanna qanoq iliussanerlunga naluara. Paniga toqqissisimasumi inuutinnissaa uannut pingaarnersaavoq, taanna oqarpoq.

Inuit pisinnaatitaaffii pillugit ilisimatusarfiup JP Aarhusimut nalilerpaa, Pavia Joelsen unioqqutitsinikkut immikkoortitaasimasoq.

Atuaruk: Kalaalliugami illunik attartortitsisartumit itigartinneqartoq